Galata Capitel Düü

Quel articul chì l'è scrivüü in Lumbard, cun l'urtugrafia insübrica ünificada.

Galata

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Düü

¹Pö, despö de quatordes agn, sun naa sü de növ a Gerüsalemm cun Barnaba, e èmm ciapaa Tít cun nümm; ²e sun naa sü segund una revelaziún: e huu diciaraa a lur el vangel che predichi intra i naziún, e privatamént a quij che hinn impurtant, perchè curi no né avessi curüü in van. ³Ma gnanca Tít, che l'era cun mì, ancabén l'è grech, l'era minga ubligaa a vèss circuncis; ⁴per via di fals fradèj che hinn naa denter de scundüü, che hann faa inscì per spià la nostra libertaa che gh'èmm in del Crist Gesü, per brancàmm cuma sèrv. ⁵a i quij èmm minga cedaa in del sutamètt gnanca per un mumént, perchè la veritaa del vangel la resta sald cun vialter. ⁶E de quij che paren vèss quajcossa-- quij eren alura m'importa nagott; Diu el ciapa minga la fàcia d'una persona-- degià che paren impurtant hann giüntaa nagott de püssee, ⁷ma al cuntrari, hann vedüü che sun staa fidaa cunt el vangel per l'incircuncisiún, cuma Peder per la circuncisiún. ⁸Già che lü che l'ha lauraa in del Peder per l'apustulaa de la circuncisiún l'ha lauraa anca in de mì vèrs i naziún, ⁹e quand hann recugnussüü la grazia che 'l m'è stada dada, quij che hann parüü a vèss pilonn, Giagum, Cefa e Giuan, m'hann daa, a mì e a Barnaba, la man driza de la fradelanza, perchè sium a i naziún, e lur a la circuncisiún; ¹⁰dumà che me regurdum di pòr, la medema roba che sun cercaa de fà.
¹¹E quand Cefa l'è vegnüü a Antiochia, l'huu upost in fàcia, perchè l'era cundanaa. ¹²Già che prima che quij personn hinn vegnüü de Giagum, l'ha magnaa insèma cunt i naziún; ma quand hin vegnüü, el s'è tiraa indree, e 'l s'è separaa, perchè 'l gh'ha avüü pagüra de quij de la circuncisiún; ¹³e anca i alter giüdee hann faa ipucritamént cun lü, inscì che anca Barnaba l'è staa purtaa via cun lur in de l'ipucrisia. ¹⁴Ma quand huu vedüü che caminaven no giüstamént a la veritaa del vangel, huu dii a Peder denanz a tücc: «Se tì, anca bén te see giüdee, te vivet cuma i naziún e no cuma i Giüdee, cuma te pudarìet ubligà i naziún a devegnì Giüdee?». ¹⁵De natüra, nümm sèmm Giüdee e no pecadúr di naziún; ¹⁶e savèmm che un vèss üman l'è minga faa giüst per i oper de la lég se no per mèzz de la féd in del Crist Gesü, e nümm èmm credüü in del Crist Gesü, perchè sium faa giüst de la féd in del Crist e no di oper de la lég, perchè di oper de la lég nissüna carna la sarà fada giüsta. ¹⁷Ma se, quand cercum de vèss faa giüst in del Crist, sèmm staa truaa a vèss pecadúr anca nümm medemm, alura 'l Crist l'è un minister del pecaa? Che la sia no! ¹⁸Già che se fuu sü de növ quij coss che huu tiraa giò, me mussi cuma trasgressúr. ¹⁹Già che mì sun mort per mèzz de la lég a la lég, perchè a vivi cun Diu.
²⁰Sun staa crusefiss cun Crist: e mì vivi pü, ma 'l Crist el viv in de mì; e chèll che vivi adèss in de la carna, vivi cun féd che l'è in del fiöö de Diu che 'l m'ha vursüü bén e 'l s'è daa sé medemm per mì. ²¹Refüdi minga la grazia de Diu: degià che se la giüstizia l'è per mèzz de lég, alura 'l Crist l'è mort in van.

Navigaziun

• ← Indree a Capitel Vün
• Inanz a Capitel Trii →
• A l'indes