Francesca Scanagatta

Quest articol chì l'è scrivuu in lombard, grafia milanesa.

La Francesca Scanagatta, in todesch Franziska Scanagatta (Milan, 1 de agost 1776 – Milan, 20 de november 1864) a l'è stada 'na soldatessa milanesa de cittadinanza austriega, prima dònna a toeu part a l'Armada del Sacher Roman Imperi.

Biografia

Nassuda a Milan l'ha passaa normalment la soa vita finna al malàss del sò fradell Giovann, che 'l gh'aveva de frequentà l'Accademia militar Teresiana de Wiener Neustadt. La se vestiss dònca de òmm per frequentà l'Accademia dal 16 de febrar 1794 al 16 de genar 1797 per poeu combatt in di guerr revoluzionari frances in Germania e Italia. L'è promovuda e decoràda.

In del 1800 a l'è descoverta e congedada, cont ona pension. La se marida cont el nòbil Celestino Spini e la fa quatter fioeui.

El 6 de giugn 1852, voramai anziana, la va al galà per i 100 agn de l'Accademia teresiana, in divisa, e l'è decorada.

Aneddot

Se cunta su che 'l sò popà el sia 'ndaa del Comandant del Reggiment de la fioeula e vist che lu el saveva no el todesch e 'l comandant el saveva no l'italian han parlaa in latin e 'l pader l'ha doperaa el gener femminin per la fioeula. El comandant l'ha però sospettaa nagòtt perchè 'l sospettava che 'l fuss ignorant.

Bibliografia

Vittorio Adami, La signorina Francesca Scanagatta milanese ufficiale nell'esercito austriaco, Varese, Tipografia Varesina, 1925, Estratto dalla "Rivista d'Italia", 1923, vol. II, fasc. I.
Giacomo Lombroso, Vite dei primarj ufficiali italiani che si distinsero nelle Guerre Napoleoniche, Milano, Borroni e Scotti, 1843
Emanuele Pigni, La Guardia di Napoleone re d'Italia, Milano, Vita e Pensiero, 2001. 88-343-0661-9
Tina Del Ninno; Franca Feslikenian, Francesca Scanagatta. Milanese, ufficiale (1776-1864). La storia e l'avventura, Milano, Italia Press, 2011. 88-97219-19-5

Vos corelaa