Fistola anal de Luis XIV

De Wikipedia
Salta a la navigazzion Và a cercà
Lumbard ucidental Quest articol chì l'è scrivuu in lombard, grafia milanesa.
El Re

La fistola anal l'è staa vun di tanc malagn del Luis XIV, e la soa guarigion, fada cont di metodologij sperimentai, la gh'ha avuu 'na grossa risonanza in tutta la Franza e anca in Europa, e gh'è staa tanc festeggiament.

La fistola[Modifega | modifica 'l sorgent]

La fistola l'è vegnuda foeura a l'inizzi del 1686, a l'inizzi l'era no dolorosa, ma poeu l'è vegnuda invalidanta e 'l Re, che 'l amava 'nà a cavall, l'ha poduu pu, a 48 agn.

I sò omen parlaven de 'n tumor al garon, ma poeu, vista la diatriba in sul comé curàll l'è vegnuda publega la presenza de la fistola.

Comé hemm descovert incoeu, andà a cavall e fàss i levativ del cuu, roba frequenta in quij agn, faseven desviluppà i fistol.

Tanc farmasista hinn 'naa a Versailles per provà a curà el Re e donca entrà in del sò entourage, ma poeu l'è staa scernii l'intervent del cerusegh de cort Charles-François Félix, che l'ha tajaa la fistola in d'on intervent de 'n trè or.

La granda operazion[Modifega | modifica 'l sorgent]

El cerusegh, prima de toccà el Re, l'ha provaa l'operazion in su 'n poo de pover, 'na settantina circa. Tanc hinn mort, e hinn staa seppellii senza campan e al mattin.

Felix l'ha donca poduu desviluppà on cortell apposit, cont 'na lama recurva e 'na protezion per tajà no el rest de l'ano.

El 18 de november del 1686 in gran secrett, l'è staa operaa a Versailles, lontan de la Cort che l'era reunida a Fontainebleau, domà cont i medegh e la sò miee Madame de Maintenon.

La moda[Modifega | modifica 'l sorgent]

L'operazion l'è 'ndada ben, e giamò dal genar 1687 l'era guarii el Re, tant che 'l cerusegh l'è staa decoraa e l'ha daa tanta dignità a la sò categoria, che prima l'era pussee vesina ai barbee, quand che 'l medegh l'era on scenziaa che 'l dava domà di consili.

Tanta gent l'ha scominciaa, per moda, a fà el midemm intervent, anca se despess gh'era no bisogn.

De facc, la vista de 'n Re inscì fort e bon de guarì l'ha juttà in del sò progett de revoca de l'Editt de Nantes per spostà l'oggett de l'unità nazional da la religion al Re.

Bibliografia[Modifega | modifica 'l sorgent]

  • (FR) Stanis Perez, La santé de Louis XIV : Une biohistoire du Roi-Soleil, ed. Champ Vallon, Parigi 2007.
  • (FR) Marie Joseph Louis Alard e Nicolas Philibert Adelon, Dictionnaire des sciences médicales, Parigi, 1782-1862.