Enrico Crespi

Quest articol chì l'è scrivuu in lombard, grafia milanesa.

L'Enrico Crespi (Bust Grand, 13 de agost del 1877 - Sestriere, tredes de luj del 1965) l'è staa on poeta lombard.

Biografia

Restaa orfen de mader a ses agn, e de pader a noeuv, l'è staa fidaa a la zia Maria, che l'ha faa studiaa al coelegg di Salesian, poeu a Turin. L'è deventaa maester de disegn e pitura a Locarn.
L'ha faa el soldaa a Cremona e Piasenza; quand che l'è tornaa a Bust, l'ha lavoraa 'me impiegaa in vari aziend. In del 1904 el s'è sposaa. In de la prima guerra mondiala l'ha combattuu in de la zona de Brentonegh, in Trentin.
A on bell moment l'ha deciduu de scriv i sò poesii domà in lombard (bustocch); l'ha publicaa quatter volumm de poesii e l'ha scrivuu on rimari bustocch e la prima gramatega de 'sto dialett.
In tra i sò vari ativitaa, l'ha fondaa la sociazzion coltural La Famiglia Bustocca. L'ha scrivuu anca 'na muggia de articoi in su la storia de la soa città.

Oeuver

Busti cha scumpaj - Robi vegi e noêui (1957)
I mesi ed i lunari bustocchi (1958)
'Na fiamma e 'na canzon (1959)
In cerca pa' i straj dul mondu (1961)
Eco di voci lontane (1961)

On esempi de poesia

BASTEM (ciappada de 'Na fiamma e 'na canzon)

Chi bastem cha sa senti dì da tanti,
in d'un atu da füja, senz'intenzion
da vuè ufendi Signui, Madona o Santi,
par men hin segn da poca educazion.

Ma candu a vedu da sti prufanazion,
da sti caricatüi, inscì ripügnanti,
cha hin véri insülti a nostra religion,
e j calpestan misteri, i püsè santi,

cha hin partu, a disu, d'animu parversu,
che dümà bava in sü 'l pasagiu al lasa
e che ogni dignità l'ha urmai già persu.

Che hin pegiu, a disu, pegiu d'una pesta;
parchè, se i prim hin di bastem cha pasa,
chesti hin bastem sacrileghi cha resta...

Bibliografia

Franco Poerio, Rievocando Enrico Crespi in Almanacco della Famiglia Bustocca per l'anno 2000, La Famiglia Bustocca, pp. 28-37.
AA. VV. Antologia dei poeti nelle lingue e nei dialetti lombardi dal Medioevo al XX secolo, Milan, Libri Schweiler, 2006.