Bicing

De Wikipedia
Va a: navegá, truvá
Lumbard ucidental Quest articol chì l'è scrivuu in lombard, grafia milanesa.
Logo de Bicing

Bicing a l'è on servizzi de bike sharing de la città de Barcelona ativ da l'inizzi del 2007. El permett a tucc i abonaa de ciappà ona bici a gratis o, a segonda del temp, cont ona zifra piscininna in del territori comunal de Barcelona, in di stazion aposta arent di stazion di tram, metro e treni. L'è staa parpoeust de slargàll a di alter Comun vesin comé l'Hospitalet de Llobregat e Badalona, e l'è finanziaa cont i danee di abonament e de l'area verda de Barcelona.

Prezz[Mudifega | mudìfica 'l sorgènt]

A gh'è domà l'abonament che 'l dura on ann, anca se in progett a ghe seren anca di abbonament settimanai e che 'l costa 47,16€. Per fàll boeugna avègh o 'na carta d'identità spagnoeula (DNI) o on document per i forestee (NIE).

'Sto abonament el permett de ciappà ona bici a gratis per 30 megnuu, e finna a dò or la costa 0,74€ per mezz'ora o frazion. Se se superen i dò or a gh'è ona penal de 4,49€ per ora o frazion, e se in 24 or a se dà no indree la bici a gh'è ona multa de 150€.

Fonzionament[Mudifega | mudìfica 'l sorgènt]

Ona voeulta faa l'abonament in l'officina Bicing a l'è assee andaa ai stazion Bicing che se troeuven in gir in tutta la città e specialment aproeuv di stazion di metro, treni e tram e passà la tessera de Bicing. Ona voeulta passada gh'è trii megnuu per provàlla e dàlla indree se gh'è on quaj problema.

Se al moment de restituìlla la stazion a l'è piena el sistema el da alter 10 megnuu de credit per andà a la stazion pussee vesina.