Attach informategh al comun de Milan del 2006
Durant i primm mes del 2006, el sistema informategh del Comun de Milan a l'è staa colpii da du malware: El Kamasutra, cognosuu anca 'me MyWife, e dal Spybot, on malware del 2003.
Dinamica di fatt
[Modifega | modifica 'l sorgent]L'infenzion pussee importanta l'è stada descoverta in di ultim dì de genar del 2006. El comun el gh'avea nò el temp per "disinfestà" i computer.
Quell malware, el terz di de ogni mes, el scancella i dòcument de tipo DMP, DOC, MDB, MDE, PDF, PPS, PPT, PSD, RAR, XLS e ZIP
El comun l'ha ordinaa de smorzà i computer la sira del 2 e de pizaj no fin al 4 de febrar, per evità l'attivazion del malware.
Poeu, per el comun, a l'era sicur pizzà i PC.
Inveci, el 7 de febrar, durant de ona conferenza cont el minister de l'innovazion Lucio Stanca, i altoparlant de Palazz Marin han dii:
I lavorator hinn pregaa de smorzà i computer perchè hinn ancamò infetaa dal virus Kamasutra
(IT) - I dipendenti sono pregati di spegnere i computer perché sono ancora infettati dal virus Kamasutra
I computer, probabilment giamò dannegiaa dal Kamasutra (che el proeuva a scancellà tucc i antivirus), hinn staa infetaa dal malware Spybot, vegg del 2003. L'infezion l'ha provocaa tant dann ai servizzi per i cittadin, per esempi, l'anagrafe. Questa infezion chi a l'è durada almanch on mes, fin al principi de l'april del 2006.
Vist che 'l Spybot el se spantega in su la red de file sharing Kazaa, quajvun, 'me el Paol Attivissimo, l'ha ipotizaa che in di computer eren faa di descarigament illegai.
Conseguenz
[Modifega | modifica 'l sorgent]El sindegh de Milan Gabriele Albertini l'ha daa la colpa a di presunt "hacker di center sociai", anca se l'infenzion la gh'ha de vegnì da "denter", per esempi on dipendent che 'l derva on allegaa infettaa, soratutt per el Spybot, che 'l se spantega in di red de scambi illegal.
L'è vegnuu foeura anca che i computer i eren minga protegiuu ben: El Spybot el poseva vess evitaa cont el mett in del computer el Service Pack 2 del Windows XP.
Vergun l'ha parpognuu de mett el Linux in di computer del comun 'me soluzion per volzà la sicurezza, ma a l'è staa mìnga scoltaa.