Sonetti prostatici

Quest articol chì l'è scrivuu in lombard, grafia milanesa.

I Sonetti prostatici hinn ona regolta de poesii in lombard del poeta bosin Speri Della Chiesa Jemoli, scrivuu in del 1942 e publicaa in del 1975, 29 agn dopo la mort del sò autor.
Se tratta de on rosc de sonett che l'autor l'ha scrivuu quand, a settantasett agn, el s'è trovaa a dovè fàss operà per di problema de prostatite, e che 'l ghe mandava ai sò amis despoeu ogni intervent di dotor.
In di sonett la vegna foeura tutta l'ironia del poeta (che se ved giamò a partì del titol de la regolta), ma anca i sò tribuleri e i sò cuntee per la salud.

Citazzion: Sonett IV

Hoo fenii incoeu la terza applicazion
de trè sedutt ognunna de qui "ragg"
che dovrissen avegh el gran vantagg
de ridù quella gianda a la reson

per fà che la disturba pù i fonzion
inerent a la canna del pissagg
e che la sia fenida cont quell scagg
che tegniva i me donn in apprension.

E voeura el Ciel, dopo sto battaclan,
che no me troeuva anmò settaa in su l'assa
coi risultaa d'on pugn de mosch in man;

come fa col brutt temp la nebbia bassa,
conforma del proverbi di villan:
che tal le troeuva e tal-e-qual le lassa.

Bibliografia

• Speri Della Chiesa Jemoli, Su e giò per i rotai..., ed. Lativa, Vares, 1995.