Pizz di Trii Signor
El Pizz di Trii Signor (Pizzo dei Tre Signori) l'è ona montagna de la Lombardia, alta 2554 meter.
La se troeuva in la cadena di Orobi e l'è spartida tra la Provincia de Lecch (la val Biandin, in Valsassina), la Provincia de Sondri (la val Sgeroeula) e la Provincia de Bergom (la val Brembana).
Quella division chì la se liga anca al nomm de la montagna: de fatt, i trii territori, fina a la fin del Settcent, partegniven a trii padron different (la Valtellina ai Grison, la Valsassina al Ducaa de Milan e la Bergamasca ai Venezian).
I versant principai de la scima hinn quei che scenden giò vers i vai ch'emm dii de soravia, e presenten di itinerari de salida minga complicaa, anca s'hinn bei longh; vun di pussee interessant però a l'è quell che 'l riva in sul pizz a partì de la Valsassina per la cresta ovest: sotta a la scima se ved on gran bell paesagg de rosc con cadenn speciai per rampegà sù, e che l'è ciamaa Il Caminetto.
De la part de la Valtellina se fa anca del sci alpin, già che l'è on percors bell longh e ghe passa pocca gent per scià. La scima, frequentada squasi tutt l'ann, la mostra on panorama bell grand e interessant, che 'l mostra anca i montagn valtellines (compagn del Masen e de la Bernina) e i vai bergamasch.
In Valsassina se troeuva el Rifugio Grassi, vun de quei storigh per l'alpinismo lombard.
