Aureol
De Wikipedia
El Mani Acili Aureol (Manius Acilius Aureolus in Latin; ...-268) l'è staa on militar roman. L'è vun di Trenta Tirann (i usurpator che hinn vissuu duranta el regn del Gallieni) nomenaa in de l'Historia Augusta. El comandava i soldaa a cavall a Milan sòta l'imperi del Gallieni, al qual l'ha contenduu 'l podè in del 267. Qust l'è success menter che 'l Galieni a l'era in guerra contra i Gòtt.
Se conoss minga la soa origin, ma se pensa che 'l fudess originari de la Dacia (el vegg nòmm de la Romania). L'Aureol l'ha faa la soa prima comparsa in de la Stòria in del 258, quand i sò cavalier hann batuu l'ususrpator Ingenuo arent a Osijek (Croazia). In del 260 l'ha inveci comandaa i fòrz che hann sconfigiuu i duu Macrian (el Magior e 'l Minor) semper in di Balcan. Poeu l'è andaa cont el Gallieni a combatt contra l'Imperi di Gali. Questa campagna l'ha portaa a la reconchesta de la Rezia (la Svizzera), senza però riessì a tirà giò l'usurpator Pòstum. In seguit, l'imperador l'ha lassaa a Milan l'Aureol per defend l'imperi de alter atacch del Pòstum, menter lù l'andava a combatt contra i Gòtt.
Probabilment, alora el Pòstum e l'Aureol s'hinn leaa contra el Gallieni. Dòpo avè sentii che l'Aureol l'aveva radunaa on gròss esercit per andà contra Roma, el Gallieni l'è tornaa in Italia. Dòpo vess staa batuu arent l'Ada, l'Aureol l'è staa contringiuu a retiràss drent a Milan. Ma duranta l'assedi, el Gallieni l'è staa massaa de on tal March Aureli Claudi, che l'è diventaa el noeuv imperador cont el nòmm de Claudi II el Gòtich. 'Sto chì, quand l'ha ciappaa Milan, l'ha voruu minga salvà l'Aureol e l'ha fà coppà.
