San Bernardì a Ranzanìch

De Wikipedia
Jump to navigation Jump to search
Chest artícol a l'è scricc in Lumbàrt Orientàl, ortograféa ünificàda Lombard oriental


La cezìna de San Bernardì a Ranzanìch


La cezìna (o oratòre) de San Bernardì de Ranzanìch l’è 'n del cümü de Ranzanìch in pruìnsa de Bèrghem e la se tróa fò del paìs sö la stràda ègia che a mèsa còsta la menàa zó ‘nfìna a Énden söl làch de Spinù.

La stòria de la cezìna[<small>Mudifega</small> | mudìfica 'l sorgènt]

La céza l’è stàcia dedicàda al San Bernardì de Siéna come sègn de deosiù per chèsto sant francescà che ‘n del 1417 l’è stacc ciamàt in tate sità e paìs lumbàrcc per mèt ùrden in di convèncc, combàt i erètech, portà la pas e de fàti gràsie al sò ‘mpègn, la zét l’à gh’à üt ol benefése de troà de nöf l’ardùr religiùs.

La céza i ‘l l’à fàcia sö tra la fì del sécol XIV e ‘l prensépe del sécol XV, ol presbitére co la sò òlta gòtica l’è la part piö ègia de la céza, la naàda a trè campàde l’è del sècol XV, menimà ‘l pórtech co i colòne de préda de Sàrnech l’è stài fai sö tra ‘l 1786 e ‘l 1790 e l’è stài dovràt cóme ricòer per i malàcc de pèste e di ótre epidemìe.

L'architetüra e i afrèsch[<small>Mudifega</small> | mudìfica 'l sorgènt]

La faciàda l’è “a capàna” con trè finèstre, öna l'è sùra la pórta e dò i è ‘n bànda, scolpìt dét in del portàl ‘l gh’è ‘l istèma del San Bernardì de Siéna. Dét in de la céza l’altàr l’è baròch, la pàla in del mès la gh’à öna curnìs de màrmo nìgher policròm e ‘l paimét l’è de matù.

Sö i mür de la naàda gh’è di afrèsch, quàze töcc del sécol XV, rafinàcc e fantasiùs in di colùr dovràcc, tra i persùne i rafigüràde, ‘nsèma a la Madóna e al Gezü, ol San Bernardì de Siéna, afrescàt piö de öna ólta e ach co in mà 'l libèr dervìt e ‘l monogràma de Nòst Signùr che ‘l San Bernardì de Siéna ‘l dovràa in di sò sermù, gh’è pò la Sànta Löséa, afrescàda dò ólte, la Sànta Apolònia, ol San Sebastià e ‘l San Ròch, che i è i dù sancc protetùr cóntra la pèste e töte i malatìe.