Pès

Chest artícol a l'è scricc in Lumbàrt, ortograféa orientàl unificàda.

I pès i è dei animài vertebràcc acquàtich dotàcc de brànchie e de pìne, col còrp de sòlet töt quarciàt de scàie. Se i tróa tat endèle àive dólse (lach e fiöm) come che 'n àive salàde (mar): se i tróa tat endèle surtìe de mut (salmerì de le fontàne, gubiù) come che 'ndèle àive piö fónde deo océani (Saccopharyngiformes, Anoplogaster cornuta).

La prezènsa de pès endèi spècc de àiva però l'è mìa pròpo omogènea: presapóch el 50 % dei pès i vif endèl 17 % de la superfìce dei océani.

Sicóme che l'ambiènt sotamarì l'è mìa tat fàcil de frequentà per l'òm, se pènsa che divèrse spéci de pès le sàpe amò de scopréser.

El pès l'è sfrötàt de l'òm per:

• l'alimentasiù: pèsca e piscicültüra.
• atività ricreatìve: aquariofilìa, acquàre püblich.

Clasificasiù scentìfica

Endèla clasificasiù filogenética, utignìda co l'aplicasiù de sistémi cladìstich, el ragrüpamènt dei pès l'è parafilétich. La clas dei pès (Pisces) de la clasificasiù clàsica l'è süperàda. Le spéci de pès che gh'è al dé d'encö i è repartìde endèi taxa Actinopterygii (che i è chèi piö cümü), Chondrichthyes (le ràse e i squàli), Dipnoi, Actinistia, Myxinoidea e Petromyzontidae.