Pedrioeu

Quest articol chì l'è scrivuu in lombard, grafia milanesa.

On tipich pedrioeu de cusina.

El pedrioeu (ciamaa pur pidrioeu in d'ona quai zona o anca cornasell o tortaroeul in Lombard Oriental), l'è on tub cont ona bocca larga e ona bocca stretta. L'è dopraa per incanalà e trasferì i liquid ò i ròbb a grana fina dent in di contenitor cont on'apertura stretta, per esempi i bottili.

I pedrioeu a hinn normalment faa de ferr, de veder ò de plastica, a segonda del perchè se doperen. Per esempi, quii faa de ferr a hinn dopraa per trasferì la nafta ò la benzina, quii de veder a hin dopraa in di laboratòri chimich e quii de plastica in cusina.

La radis de la paròla pedrioeu l'è l'istessa de la paròla antiga tipega de l'Altitalia pidria, che l'è un pedrioeu dopraa per travasà el vin denter i bott.

Moeud de dì tipich milanes

• "Vess invers come ona pidria", che'l voeur dì che vun l'è pròppi invers. El pedrioeu se pò nò fall stà in pee de la part stretta: per fall sta in pee, bisògna mettell invers (da la part larga).
• "Mangià col pedrioeu", quand che vun el mangia in pressa.

Riferiment

• Treccani