Giovann Paol Lomazz

Quest articol chì l'è scrivuu in lombard, grafia milanesa.

El Giovann Paol Lomazz, cognossuu anca 'me Compà Zavargna (italian: Giovanni Paolo Lomazzo; Milan, 26 de april del 1538 - Milan, 27 de genar del 1592) l'è staa on pitor, critegh d'art e poeta milanes.

Vita e oeuver artistegh

L'ha dit de avè studiaa insemma al Giovann Battista de la Cerva (erede de la botega del Gaudenzio Ferrari, vun di artista pussee important del Manierism lombard), l'ha scominciaa la soa cariera de pitor cont ona serie de afresch che regordaven anmò l'art del Bernardin Luin, in de la gesa de Caronn Pertusella, arent al Bernardin Camp. Poeu dopo l'ha frescaa el refettori de Santa Maria de la Pas a Milan, cont ona copia de l'Ultima Cena del Leonard (trada giò ai temp de la II Guerra Mondial) e quell di Agostinian de Piasenza. Ghe resta negott di sò litratt, che però el someja che gh'abbien portaa on certo sucess: el par che l'abbia faa i litratt di cardinai Giovann Girolom Moron e Lissander Crivell, el marches Francesco d'Avalos, dò sorell del Carlo Borromee e on quai princip todesch.

Invers la fin di agn '60 e i primm '70 el Lomazz l'ha dipingiuu ona serie de pal d'altar per ges milanes, quasi semper su tavola. I sò quader pussee important però hinn quei de la capella Foppa a San March a Milan (1573), indè che l'ha frescaa dò stiri de San Peder e San Paol, ona Gloria d'Angel e ona pala d'altar con la Madonna e Sant. Poch dopo quell'oeuvera chì l'è deventaa sguersc.
L'è mort arent a Porta Cicca a 53 agn. El sò unegh aliev important a l'è staa l'Ambroeus Figin.

Oeuver letterari

Collezione delle migliori opere in dialetto milanese - Paolo Lomazzo

Dopo che l'è deventaa sguersc, el Lomazz el s'è dedicaa a scriv e sistemà i sò scritt, che hinn tra i pussee important per 'vèggh notizzi del Manierism e di pitor de la Lombardia, oltra che per i sò notazion teoregh.
Ma el Lomazz l'è staa anca on poeta, sia in italian, che in lombard. In italian l'ha scrivuu I Grotteschi, intant che in lombard l'ha faa su i Rabisch. Quella oeuvera chì l'è stada scrivuda in fachinesch, ona specie de dialett tesines compagn a quell di fachin che vegniven giò a Milan de la Val de Blegn, ma mes'ciaa con influenz milanes e anca spagnoeu. I sò poesii in lombard hinn legaa a la soa partecipazion 'me member (e poeu 'me "nabad", cioè abaa) de l'Academia di Fachin de la Val de Blegn. Quell chì l'era on rosc de artista, musicista, artisan e omm de teater che se incontraven de scondon sotta la protezion de Bacch, con di scormagn. El stranomm del Lomazz a l'eva Compà Zavargna. (Paolo Lomazzo Rabisch drà Academiglia dor compà Zauargna, nabad dra vall d' Bregn, ed tucch i su fidigl soghit, con ra' ric enciglia dra valada. Or cantò di suersarigl, scianscia)

“	El più stentà penchiò de tut Miran A le un garzon dei Camp e dei Figin, Compagn giurà de Togn de Bergamin, E amis tut du d'Andrea che no g’ha pan. Costor laghei andà de man in man A baià chì e lì di su scouin, Che fà penchiur nomà d'oltramarin, Ch'in bon da forbì i chiap a Caurian. Costor van coronà com es fà i bu D'ai, de por, de meregasc e giand, E mandai in trionf sura di su Asnin; e in man spegasc pisnin e grand, E incontra a lor ghe va la Stentaura Che nomà di por su sen fa gran cura. ...	”
—A un penchiò da un bez

Bibliografia

R. Klein, Les sept gouverneurs de l’art selon Lomazzo, in «Arte Lombarda» IV, 2, 1959, pp. 227 ss.
S. Stefani, Idea dello stile della pittura di Giovan Paolo Lomazzo, in «ACME», XVI, fasc. II, 1963, pp. 41 ss.
G. M. Ackerman, The structure of Lomazzo’s Treatise on Painting, [PhD] Ann Arbor, Michigan, 1964
J. B. Lynch, Giovanni Paolo Lomazzo’s self portrait in the Brera, in «Gazette des Beaux Arts», LXIV, 1964, pp. 189 ss.
G. P. Lomazzo, Scritti sulle arti, a cura di R. P. Ciardi, Fiorenza 1973-1974
G. Romano, Giovan paolo Lomazzo, in Gaudenzio Ferrari e la sua scuola: i cartoni cinquecenteschi dell'Accademia Albertina, Turin 1982
F. Martinelli, L’opera pittorica di Giovan Paolo Lomazzo, tesi di laurea, Università Cattolica di Milano, a.a. 1983-1984, relatore M. Boskovits
M. Kemp, Equal Excellences: Lomazzo And The Explanation of Individual Style in the Visual Arts, in Renaissance Studies, vol 1.1, Londra, 1987
G. Bora, Da Leonardo all’Accademia della Val di Bregno: Giovan Paolo Lomazzo, Aurelio Luini e i disegni degli accademici, in «Raccolta Vinciana», XXIII, 1989, pp. 73-101
G. P. Lomazzo, Rabisch, a cura di D. Isella, Turin 1993
B. Agosti - G. Agosti, Le tavole del Lomazzo (per i settant'anni di Paola Barocchi), Bressa 1997
Rabisch, Il grottesco nell’arte del Cinquecento. L’Accademia della Val di Blenio, Lomazzo e l’ambiente milanese, catalogo della mostra Lugano 1998 a cura di M. Kahn-Rossi e F. Porzio, Milan 1998
G. Bora, Giovan Paolo Lomazzo, in Pittura a Milano. Rinascimento e Manierismo, a cura di M. Gregori, Milan 1998, pp. 272-274
G. P. Lomazzo, Della forma delle Muse, a cura di L. Tongiorgi Tomasi-A. Ruffino, Pisa, 2002
L. Lanzeni, Due ‘Crocifissioni’ di Giovan Paolo Lomazzo già nella chiesa milanese di S. Giovanni in Conca, in «Proporzioni», n.s., IV, 2003, pp. 39-78
C. Manegold, Wahrnehmung - Bild - Gedächtnis. Studien zur Rezeption der aristotelischen Gedächnistheorie in den kunsttheoretischen Schriften des Giovanni Paolo Lomazzo; Ph.D. thesis. Published as Studien zur Kunstgeschichte vol. 158; Olms 2004. ISBN 3-487-12675-3. In todesch
D. Isella, Lombardia stravagante, Turin 2005

Vos corelaa

Interprogett

lmo-Wikisource

A un penchiò da un bez

Del sora scricc Baciocch, barzeletta sora del maridas

Su, sù, Borgnign, co fett, dùrmet anch mò