Anschluss

Quest articol chì l'è scrivuu in lombard, grafia milanesa.

Gerarca nazista a Vienna

L'Anschluss l'è stada l'annession de l'Austria a la Germania vegnuda in del 1938 per formà la Granda Germania.

Storia

Inanz de la I^a guerra mondiala

L'ideja de giontà insemma tucc i popoj de lengua germanega la gh'era anca in del secol quell de 19, ma vista la nassida de la Confederazzion Germanega, che despoeu l'è devegnuda l'Imper Todesch, che la lassava foeura l'Austria, l'è remagnuda domà on'ideja, anca se 'l govern austriegh la voreva applicà 'me capo de la noeuva Germania.

1918-1933

Cont la finn de la guerra, i trattaa de pas deciden de separà l'Austria de la Germania, anca se in quij agn gh'era on poo la voeuja de giontass, tant che in de la Costituzzion Austriega gh'era scrivuu che "L'Austria l'è ona republega democratega" e "L'Austria Germanega l'è on tocch de la Republega Germanega". I plebiscitt del Tirol e del Salisburghes daven el 90-99% a l'unificazzion.

El trattaa de Versailles e quell de Saint-German proibiven l'union, e i todisch pensaven che 'l fudess 'na limitazzion al principi de autodeterminazzion di popoj.

A bon cunt, in di agn 1920-1930 la mira politega l'era l'Anschluss, e in del 1931 se parlava de on'union doganala in tra i dò paes.