Stema de Lod

Quell articol qì l'è scrivud in Lombard, cond l'ortografia Scriver Lombard.

Stema de Lod
Blasonadura
D'or a la crox piana de ross

Ol stema storeg de Lod l'è un scud d'or con una crox rossa.

Stema ofiçal de l'aministrazion comunala

Ol stema ofiçal del Cumun de Lodi l'è simel a qell storeg, con in plœ i ornaments esterior de citaa.

Storia

Sœ l'orijen del simbol g'è plœ ipotesi: di storeg i pensa qe al vegneress da la Prima Croxada (1095), ma g'è mìa di prove qe la citaa l'habie partecipad a l'impresa. La plœ part di studios i sostegn invece un'orijen plœ antiga, perqè la crox d'or in camp ross la vegn dal stema de l'imperador Costantin, i color i saress stait invertids. Segond qesta interpretazion, ol simbol citadin al saress stait cread jamò prima de la croxada, per diciarar la so fedeltaa a l'imperador e distinguer i trœpe de Lod ind i bataie.

De sigur, Lod l'è staita recognossida in manera ofiçal come citaa da l'imperador Barbarossa ol 3 de december del 1158.

Ol stema de Lod, fina al 1922 (ann de l'istituzion de la Provinça de Lod), l'era ind el terz quart del Stema de la Provinça de Milan.

Dal 25 de setember del 2010, la bandera citadina (qe la g'ha la stessa blasonadura del stema) in forma triangolara l'è staita metida sœ la cima del Torrion del Castell Visconteo.

Rapresentazion

Ol stema l'è rapresentad in plœ lœg de la citaa:

• Sœ la façada del Brovet.
• A l'esterno e a l'interno del Tempio Civico de la Beata Verjine Incoronada, edificad ind el XV secol coi solds del Comun come espression de la relijositaa popolara.;
• Sœ la lapide de la ciexa de la Pax.
• A l'ingress de l'ex convent de San Paol.
• Sœ l'arco de Porta Cremona, l'uniga restada di antige porte de la citaa;
• Sœl portal del vegg palaz de justizia.
• Sœl portal de l'istituto tenico Agostino Bassi.
• A l'ingress de la sede de l'azienda municipalizada Astem.
• A l'ingress del Cimitero Monumental.
• A l'ingress del poligono de tiro.

Ol gonfalon

Ol gonfalon del comun (esponid in ocasion di cerimonie ofiçale) al g'ha sœl front ol stema e sœl retro do scene storige: la prima l'è dedicada al patrono san Bassiano, e la seconga la rapresenta ol Barbarossa (fondador de Lodi) ind el at de consegnar ai citadin i insegne de la nœva citaa.

Galleria d'imajin

• 
  Ol stema sœ la façada del palaz del Brolet.
• 
  Ol stema ind una lapide de la ciexa de la Pax.
• 
  Ol stema ind la dominazion austriega.
• 
  Ol stema a l'ingress del Istituto tenico Agostino Bassi.
• 
  Ol stema ofiçal al dé d'incœ.
• 
  La bandera de la citaa.