Numbers station
|
Quest articol chì l'è scrivud in lombard, con la Noeuva Ortografia Lombarda |
Per numbers station (stazzion di numer in lombard) la se intend una stazzion radio a onde curte che la trasmet soratut numer, se pensa destinad a agent secret foeura del Paes, che i decifren a travers de 'n tacoin che 'l se dopera una voeulta. Doperen per la pupart di vos sintetizade, anca se ghe n'è che doperen de la sgent vera, del codes Morse o anca di tecnologie moderne compagne del PSK o del FSK.
Cognossude almen de la Gran Guerra, i radioamator e hobbysta compagn i registren e classifeghen per passion. Nissun governo l'ha mai confermad i so roeull, ma un quajvun l'ha dad di indicazzion. Assee frequente al temp de la Guerra Freggia, incoeu ghe n'è de manch ma resten doperade. In d'un quaj cas inn stade al center de cas legai, per esempi quell di Cinch Cuban, che doperaven una radio per scoltà di messagg de Cuba per poeu decifrài cont un software. L'istess el val per l'Ana Montes, che l'ha spionad per Cuba intant che la lavorava per el governo di Stat Unid.
Ghe n'è che trasmeten cont una tabella ben cognossuda e ghe n'è che trasmeten a cas, adiritura el capita che trasmeten in su frequenze a cas, tant de fà interferenza. Di voeulte i aversari ghe fann jamming contra. De stazzion famose gh'è el Lincolnshire Poacher, UVB-76, Yosemite Sam, The Pip e The Squeaky wheel.
Riferiment[Modifega | modifica 'l sorgent]
Alter proget[Modifega | modifica 'l sorgent]
Wikimedia Commons el gh'ha dent imagin o alter archivi su Numbers station
