Meza Spada
|
Quell articol qì l'è scrivud in Lombard, cond l'ortografia Scriver Lombard. |
Col termen Meza Spada, ind el combatiment coi spade a do man, l'è indiciada la tecnica de ciapar salda la part centrala de la lama con la man libera, per circar de portar dei colp plœ forts e precis contra dei aversare con o senza armadura. Ol termen l'è la traduzion de l'orijenal todesc Halbschwert, qe l'indiciava la tecnica de colpir mit dem kurzen Schwert, "con la spada scurtada".
Qesta tecnica l'è dovrada ind la plœ part dei scœle de sqerma tradizionala: todesca, inglesa e italiana.
Descrizion[Modifega | modifica 'l sorgent]
La tecnica de la Meza Spada l'è dovrada per dar di colp plœ forts e precis. Insema a la Mordhau l'è la plœ indiciada contra i aversare qi dovra di armadure a piastre, contra i quale l'è inutel dovrar i colp de tai.[1] La plœ part di tratads medieval i dix qe i combatiments intra aversare con l'armadura donca i era faits con la Meza Spada: i do i circava de colpir con forza i ponts deboi de la protezion, per esempe i sele e la gola. La manovra l'era dovrada anc per finir i nemix a terra.
Una qualc arme i è staite modificade prope per qell dovrar qé, con la creazion de un ricasso. Di volte l'è trop vixin a la guardia, e al pœl vesser dovrad adoma in situazion particolare. Ol ricasso in di spade plœ longe l'è una granda area faita prope per facilitar la presa ind el duell. Filippo Vadi al dix qe la spada la pœl vess anc molada adoma in ponta.[2]
Bibliografia[Modifega | modifica 'l sorgent]
- Codex Wallerstein, ed. Zabinski, Paladin Press, (2002), ISBN 1-58160-339-8.
Riferiments[Modifega | modifica 'l sorgent]
- ↑ Tobler, Christian Henry (2001). Secrets of German Medieval Swordsmanship. Chivalry Bookshelf, 287–289. ISBN 1-891448-07-2.
- ↑ Vadi, Philippo (2013). De Arte Gladiatoria Dimicandi. Creative Commons License, 84.