Licee in Italia

Quest articol chì l'è scrivud in lombard, con la Noeuva Ortografia Lombarda

El Licee in Italia a l'è vuna di trè scoeule segondarie de segond grad che se poden fà in del Pajes dopo de havé finid i scoeule medie: ghe n'è del 1859, quand che 'l Stat italian el se ciamava ancamò Regn de Sardegna e inn incentrad in su 'n istruzzion minga professionalizzanta e assee umanistega. Duren tucc cinch agn, anca se gh'è di opzzion sperimentai de quater.

Materie in comun per tucc i licee inn italian (o lengua local, indova che gh'è el status de minoranza), storia e geografia, filosofia, storia de l'art, scenze naturai, fisega, scenze motorie e sportive, lengua foresta e religion o atività alternativa.

Storia[Modifega | modifica 'l sorgent]

In del 1859, con la lesg Casati, a l'è fad su el Ginnasi Licee, che 'l se faseva dopo havé finid i scoeule elementar e l'era partid in cinch agn de ginnasi, che gh'haveven italian, latin, grech, storia e geografia, aritmetega, ginnastega e religion, e trii de licee, che sgiontaven la matematega, la fisega e la chimega, la storia natural e la filosofia. In del 1892 a l'è sgiontad el studi, in del ginnasi, de la lengua francesa.

In del 1911 a l'è fad su el licee moderno, partid in du agn de ginnasi e trii de licee: 'sta scoeula chi la permeteva no de andà a studià letere e 'l gh'haveva oltra al frances una segonda lengua, ingles o todesch, e 'l dirit e l'economia, al che l'era sgiontada la filosofia.

In del 1923, sota el regim fascista, la passa la reforma Gentile, che ghe dà un roeull preminent al Ginnasi Licee, cont un roeull e 'l scassa el licee moderno, che l'è sostituid del licee scentifegh, ciapad de la veggia sezzion fisegh-matematega del Regio istitut tecnegh. In del midem ann a l'è fad su el licee feminin, dedicad ai materie de economia domestega e senza possibilità de andà a l'università, ma per i poche iscrizzion l'è serrad in del 1928.

In del 1940, con la reforma Bottai, el Ginnasi Licee el cambia nom in licee classegh, nom doperad comunque de la sgent a partì del 1911, per fà minga confusion cont el licee moderno.

In di agn '70 la scomincia la sperimentazzion, prima in di scoeule paritarie e poeu in quelle de Stat, di licee artistegh e di licee lenguistegh, e di agn '90, con la fin di scoeule magistrai, la scomincia la sperimentazzion liceal magistral.

In del 1992 la entra in vigor la sperimentazzion del minister Beniamino Brocca, che la preved cinch adresse de licee: el classegh e 'l scentifegh e, in regim sperimental, quell lenguistegh, quell socio-psico-pedagogegh e quell scentifegh-tecnologegh. In del 2000 a l'è aprovada del governo Prodi I la reforma Berlinguer che l'havaria tacad insema scoeula elementar e media e l'havaria sbassad el numer di scoeule superior, che sarien deventade ses - Umanistega, Scentifega, Tecnega, Tecnologega, Artistega e Musegal - cont un durà de ses agn, el prim comun a tucc e poeu cont un segond bienni con varie materie in comun e, a la fin, un esam, cont anca la possibilità de cambià, ma l'è stada mai aplicada, vist che el governo Berlusconi II l'ha fad una soa reforma diferenta.

La reforma Moratti del 2003 la gh'ha dent di licee noeuv, compagn de quell economegh, de quell musegal, quell di scenze umane, quell economegh e quell tecnologegh, che 'l gh'havaria havud de ciapà dent l'istitut tecnegh: a bon cunt, però, inn no stad aplicad foeura de l'ambient sperimental, vist che l'è stada fermada del minister Fioroni, del governo Prodi II, in del 2006.

La sarà la reforma Gelmini, fada in del 2008 ma aplicada in del 2010, a meter in ciar la strutura liceal italiana: i licee lenguistegh, musegai e coreutegh e artistegh deventen ofizzialment di licee, a l'è fad su el licee di scenze umane cont anca l'opzzion economega-social, che la gh'ha no el latin ma la slarga i materie de dirit e economia, menter el licee tecnologegh el deventa 'n opzzion del licee scentifegh, senza latin, al so post gh'è informatega, e cont un programa pussee orientad ai laboratori e al lat scentifegh di discipline.

De l'ann scolastegh 2018/2019 a l'è ativada 'na sperimentazzion che la permet de ciapà el diploma in quater agn inveci che in cinch, che l'è ativada in poch pussee de 140 licee, che gh'hann però pussee ore rispet ai licee de cinch agn, con la possibilità di scoeule de definì un so programa, con l'aprovazzion del ministeri. In del 2022 a l'è fad su el licee sperimental per la transizzion ecologega e digital, de quater agn, che 'l permet de ciapà la matura scentifega aplicada.

In del 2023 el governo Meloni el nonzia el Licee del Made in Italy, che 'l ciaparà dent quell economegh-social, e 'l sarà ativ del 2025.

Tipologie[Modifega | modifica 'l sorgent]

Incoeu gh'è noeuve tipologie de licee in Italia:

Licee classegh: incentrad in su la coltura classega, con poch de scenza e de matematega in del programa
Licee scentifegh: incentrad in su la scenza e la matematega, cont una bona presenza de materie umanisteghe, compagn del latin
Licee scentifegh - Opzzion Scenze Aplicade: che 'l gh'ha minga el latin in favor de l'informatega e 'l gh'ha pussee de laboratori
Licee scentifegh - Opzzion Sportiva: che la gh'ha pussee ore de sport e 'n toch de ogni materia aplicad al sport
Licee lenguistegh: incentrad in su l'imparà i lengove foreste insema ai materie de licee
Licee di scenze umane: incentrad in sui scenze umane
Licee di scenze umane - Opzzion Economegh-Social: incentrad in sui scenze umane, ma con pussee materie de tipo economegh e giuridegh
Licee artistegh: incentrad in su la storia de l'art e la produzzion de material artistegh in varie forme
Licee musegal e coreutegh: incentrad in su la danza o in su la musega

Riferiment[Modifega | modifica 'l sorgent]

Vos corelade[Modifega | modifica 'l sorgent]