Solanaceae

De Wikipedia
Va a: navegá, truvá
Chest artícol a l'è scricc in Lumbàrt Orientàl, ortograféa unificàda Lombard oriental
Solanaceae
Fiùr de la patàta (Solanum tuberosum)
Fiùr de la patàta (Solanum tuberosum)
Classifigazion sientífiga
Regn: Plantae
Phylum: Magnoliophyta
Clas: Magnoliopsida
Ùrden: Solanales
Famìa: Solanaceae

Le Solanaceae (Juss.) i è 'na famìa botànica de piànte erbàcee o lignùze co le fòie alternàde, sèmpe e sènsa stìpole, che fa part de l'ùrden de le Solanales, de la clas de le Magnoliopsida (Dicotilédoni).[1] Endèl ensèma de le Solanaceae gh'è dét en sentenér de zèner e 2700 spéci.[2]. Le solanàcee le prezènta 'na gran diersità de portamènt, murfulugìa e ecología. La famìa l'è cosmopolìta, cioè l'è destribüìda en pó 'n töt el mónt föra che 'ndèl Antártide. La diersità piö grànda se la tróa 'ndèla América del Sud e 'ndèla América Centràl.

De chèsta famìa botànica le fa pàrt divèrse spéci de piànte cumestìbile compàgn de la patàta (Solanum tuberosum), el pondór (Solanum lycopersicum), el marezà o melansàna (Solanum melongena) e 'l peerunsì (zèner Capsicum). Divèrse piànte ornamentài famùze le fà part de le solanàcee, compàgn de la Petunia, 'l Schizanthus, el Salpiglossis e la Datura. Sérte spéci i è cunusìde en töt el mónt perchè le vé dopràde come medicamènt o per i sò efècc psicotròpich. Per la ricérca le solanàcee i è 'mportànte perchè le g'ha dét 'n quach organìsmo modèl per stüdià quistiù biològiche fondamentài a leèl celulàr, molecolàr e genétich, compàgn de la piànta del tabàch (Nicotiana tabacum) e la petùnia.


Riferimèncc[Mudifega | mudìfica 'l sorgènt]

  1. Olmstead, R. G., J. A. Sweere, R. E. Spangler, L. Bohs, and J. D. Palmer. 1999. Phylogeny and provisional classification of the Solanaceae based on chloroplast DNA. Pp. 111-137. En: Solanaceae IV: advances in biology and utilization, M. Nee, D. E. Symon, R. N. Lester, and J. P. Jessop (eds.). The Royal Botanic Gardens, Kew Artìcol en inglés
  2. Olmstead, R.G. and Bohs, L. 2007. A Summary of molecular systematic research in Solanaceae: 1982-2006. Acta Hort. (ISHS) 745:255-268