La Corazzada Potëmkin

Quest articol chì l'è scrivuu in lombard, grafia milanesa.

Vuna di locandin original del film

La Corazzada Potëmkin (in russ: Бронено́сец «Потёмкин» [brənʲɪˈnosʲɪts pɐˈtʲɔmkʲɪn]) a l’è el titol d’on film mut sovietegh del 1925, dirett del Sergej Ejzenštejn e prodott del studio Mosfilm.

El film, pensaa coma propaganda revoluzionaria, el cunta su de l’ammutinament di mariner contra i offiziaj ch’el gh’era staa in del 1905 in su la corazzada Potëmkin. A l’è consideraa coma vun di mej film e vun di pu important de la storia del cinema.

Tramma e stil

El film l’è ambientaa in del giugn del 1905 in su la barca in del Mar Negher e in la cittàa de Odessa; a l’è dividuu in cinch episodi:

• “Omen e vermisej” (Люди и черви Ljudi i červi), indova i mariner protesten perchè la carn che gh’hann de mangià a l’è marscia;
• “Dramma in sul pont” (Драма на тендре Drama na tendre), indova el gh’è l’ammutinament di mariner cont el so leader, el Vakulenčuk, che l’è copaa;
• “On mort el voeur giustizia” (Мёртвый взывает Mjòrtvyj vzyvajet), indova la gent de Odessa la piansg per la mort del Vakulenčuk;
• “I scar de Odessa” (Одесская лестница Odesskaja lestnica), indova i soldaa imperiaj intervegnen e massacren la gent de Odessa che l’era dree rebelàss;
• “Enconter cont el squadron” (Встреча с эскадрой Vstreča s eskadroj), indova on squadron el gh’ha de attaccà la corazzada rebel, ma al contrari la sbassa i cannon e la se gionta a la rebellion, a sventolà la bandera rossa.

I soldaa a marcià giò di scar de Odessa

El film l’è faa su per trà denter i spettadô e, coma film de propaganda, fà capì finn del prenzippi che i marinaa rebej de la Potëmkin a hinn quij bon e i offiziaj hinn i cattiv. El simbolism doperaa in del film l’è caratteristegh de tutta la produzion de l’Ejzenstejn: la tristezza e el piant - soratutt per la mort del Vakulenčuk - la devegn revolta contra i oppressor imperiaj.
El cannon a l’è despess inquadraa dritt in de la bocca, per fà vedè a i spettadô ona immagen del poder e de la potenza de violenza e distruzion; el cannon el devegn però anca on simbol de arma per la libertàa, soratutt in de l’ultema scena. I trii monument del leon inquadraa in la revolta de Odessa hinn anca compagn e hinn simboj di trè fas de la revolta: in la prima inquadratura el leon l’è dree dormì, coma el popol ch’el subiss el poter di oppressor senza fà nagott. In de la segonda inquadratura el leon el se desseda, a representà el popol ch’el se rebella al poter tirannegh; in la terza el leon l’è dree rungì, a representà el popol che, cont la reazion violenta, el trà giò el poder.

I scar de Odessa

La scena in su i scar de Odessa a l’è la pussee famosa de tutt el film, considerada vuna di scen pussee revoluzionari e “classegh” de la storia del cinema. In la scena, i soldaa zarista marscien giò di scar a sbarà e copà tucc i rebej - civij - che troeuven; a la finn di scar la gh’hè ona division de Cosacch a cavall che la tacca la folla del bass.

La scena a l’è caratterizzada de pussee inquadratur, cont immagen de vittim coma ona donna cont on pince-nez, on fiolitt e la sò mader, on student in uniform e ona tosa in etàa de scoeura. La sequenza pussee famosa a l’è però quella dova ona mader cont el sò fioeu in la carrozzina a l’è copada e la carrozzina la siguta a andà in de per le giò di scar.

El fioeu in la carrozzina a borla giò di scar

In la realtàa, el massacher in su i scar el gh’è minga staa, ma cont el rivà de la Potëmkin in del port de Odessa gh’eren staa di demostrazion in la cittàa e i soldaa imperiaj even sbaraa in su la folla, a copà on quaj centiner de personn.

Reazion

El montagg a l’è staa completaa a man menter la pellicola l’era giamò dree vess proiettada, in la première del 21 de desember del 1925 al Teater Bol’šoj de Mosca.

El film, quand l’è staa mettuu foeura in l’Union Sovietega, el gh’ha minga avuu el success che l’Ejzenstejn el sperava; a l’è però staa de subit ben ciappaa foeura de l’Union. Quel che l’ha colpii pussee el pubblegh, però, a l’è minga staa la politega, ma el doperà inscì tant (per l’epoca) la violenza.
Al dì d’incoeu, a l’è consideraa coma vun di film pussee bej de la storia e la se troeuva semper in di elench di film mejor faa su de critegh cinematografegh e de regist famos.

In la coltura popolar

El film a l'è deventaa famosissim in Italia grazia a il secondo tragico Fantozzi indova i dependent, Fantozzi inclus, a hinn obbligaa del capo a vedè di film vegg, cont la fittizzia "La corazzata Kotiomkin" dent. On di che perden la partita de l'Italia per vedell anmò el Fantozzi el va, in del moment di comment, in sul palch per dì:

	«Per me, la Corazzata Kotiomkin, è una cagata pazzesca»

Fras che la mena a "92 menut de plaus" e a 'na rebellion di lavorator che costringen el càpo a vedè di film popolar.