Gatacòrgna

De Wikipedia

Chest artícol a l'è scricc in Lumbàrt, ortograféa orientàl unificàda.


La gatacòrgna o gata cornia, che la sarès öna gàta co i córegn, l'è ün animàl inventàt e de fantazéa che s'tróa in di fàole per i s-cetì. Chèst animàl misteriùs e spaentùs 'l servìa per fà stà bràe e bù i s-cècc e l'éra dovràda per insegnàga a übidì col mètega 'mpó de pùra. Suradetöt la Gatacòrgna del Mumbèl la servìa per mandà 'n lècc i s-cècc a la sìra[1], co stà gàta che a belazì a belazì la tacàa a ègn sö di scàle ü bazèl a la ólta e la se fermàa adóma quando töcc i s-cècc i s'éra casàcc dét in del lècc.

La Gatacòrgna del Mumbèl l'è ligàda suradetöt al teritòre cremàsch, ma la Gatacòrgna piö 'n generàl l'è cugnusìda ach in de la bergamàsca e in de la bréssana e de fati chèsto nòm 'l se 'l tróa ach söl vacabulàre del Tirabósch del 1867 e col nòm de gatacòrnia la compàr pò ach in de fàole de la Al Brembàna 'ndóe l'è sèmper öna gàta co i córegn, che la fà pùra, ma la ghe fà del mal a nisü, dezà che co i sò córegn de nòcc la ghe fà gatigulì a i pé di s-cècc che i dórma e cò i sò córegn la scàa in di mucc di büse e 'nfìna di crotaöl [2].

La Gatacòrgna dal Munbèl [3][Modifega | modifica 'l sorgent]

Gatacòrgna dal Mumbèl, sènsa còrgne e sènsa pèl. Àrda che só chè söl prim bazèl

Mama, mama sentì, sentì!

Dórma, dórma, se ta öt durmì,

Gatacòrgna dal Mumbèl, sènsa còrgne e sènsa pèl. Àrda che só chè söl segónt bazèl.

Mama, mama sentì, sentì!

Dórma, dórma, se ta öt durmì.

Gatacòrgna dal Mumbèl, sènsa còrgne e sènsa pèl. Àrda che só chè söl öltem bazèl

Mama, mama, sentì, sentì!

Dórma, dórma, se ta öt durmì.

Gatacòrgna dal Mumbèl, sènsa còrgne e sènsa pèl. Àrda che gh’ó dervìt l’ös.

Mama, mama, sentì, sentì!

Dórma, dórma, se ta öt durmì.

Àrda che ta ciàpe….”

Mama, mama, sentì, sentì!

Dórma, dórma, se ta öt durmì...

o gus, l’otre pusse gus, se vègne dó dal càmi, ta metaró ‘n dal canaros.

Riferimèncc[Modifega | modifica 'l sorgent]

  1. Ferrari V., 2010, Lessico zoologico popolare della Provincia di Cremona, pag. 61, Monografia n° 10 de la colàna Pianura, editùr Pruìnsa de Cremùna, stampadùr Monotipia Cremonese Cremùna.
  2. Bottani T., Taufer W., 2001, Storie e leggende della Bergamasca, Ferrari Ediotre, Clüzü.
  3. Filastròche d'Izà