Fisarmonega

De Wikipedia
(Rimandaa da Fisarmonica)
Va a: navegá, truvá
Lombard Occidental Quel articul chì l'è scrivüü in Lumbard ucidental urtugrafia ünificada.


La fisarmonega crumatega, o püssee cumünement, fisarmonega, (del grech fissò + armonikòs, φυσώ + αρμονικός, boff + armonegh) in frances accordéon, (a + còrdion, α + χόρδιον, donca senza corda) a l'è un strüment müsegal aerofun cunt mantess ad anza livra; l'è stada per tancc agn un strüment fulcluristegh ligaa a la tradiziun de la danza pupular.

Una fisarmonega crumatega.
New York Blues, cumpusüü e sunaa del Pietro Frosini (1916)

El prim brevett de un accordion, termen incö druvaa in tant lenguv (pür cunt variant grafigh) per indicà la fisarmonega, l'è staa lassà giò el 6 de magg del 1829 a Viena del creatur de orghen e piano Cyrill Demian e di so fjöö Carl e Guido.

Strutüra & Tecnega[Mudifega | mudìfica 'l sorgènt]

I evulüziun de tecnega e de creaziun del strüment i han semp püssee perfeziunaa el so timber e la so intonaziun, inscì de fà in möd de mett dent el strüment anca in ambit müsegaj püssee istrüii.

La fisarmonega la tö dent do butuner, vöna a destra e l'oltra a sinistra che i se sunen cunt i relativ man. La butunera sinistra la gh'ha de solet (ma minga semp) el röl de dàggh el cumpagnament müsegal e scandì 'l ritm, in del sunà suratüt cunt un register püssee grav rispett a chel de la butunera de destra, indue inscambi se sunen tipegament i meludij.

Chela butunera chì de sinistra l'è tipegament fada sö de do fil de butun relativ al register bass (ciamaa respetivament di "Bass" e di "Cuntrabass") indue a ogne butun la curespund una nota e chij not lé i henn metüü giò per orden de quinta; i següta tre o quater fil de butun tipegament relativ al register sübit püssee sgüzz, chest ültem chì i pöden vegh un mestee devers in bas al strüment, ma in general ghe preval do filusufij: chela di bass deslenguaa e chela di "bass standard".

In de la manera a bass standard i fil de butun apus di bass e cuntrabass i sunen minga dumà una singula nota per ognedün, ma piötost un acord (de do o püssee not), e i henn tö insema in bas a grupp de tri o de quater che i permett de furmà in suciaziun cunt el butun de bass sübit lineaa: la cumün pusiziun de escüziun l'è cul quart did (anülar) söl bass (che tipegament a l'è la tonega de l'acord), e del terz e segond did in sö i butun di acord apröf.

In de la manera a bass deslinguaa inscambi anca i fil de butun apus a bass e cuntrabass i sunen anca lur dumà una nota per ognedün, e in chej fil chì in tüt i se ved despusiziun tipegament crumategh de i not, anca se cunt dispusiziun variegaa rispett a la fila di bass: chela dispusiziun chì a l'è preferida in la müsega tradiziunal, ma a bun cünt la püssee spantegada.

In ogne cas el didun l'è l'ünegh did che al ven no druvaa sö chela butunera, ma 'l se druva dumà per mett in orden la man e per schiscià 'l butun de laa al mantess, che, in del dervì i büs de l'aria, al permett una magiur velucità de serament e de overdüra del mantess istess. I fisarmonegh crumatigh i pöden vegh de 48 a 120 bass: chest chì al misüra l'estensiun tutal di fil de la butunera, e donca l'estensiun tutal de l'intunaziun de l'istessa.

La segonda butunera, in söl laa dester, l'è ciamada butunera cantabil, e la pö vess in d'una manera alternativa fada cunt una tastera a mudel urghenistegh (ciamada anca mudel piano, fada de 41 tast, induve 17 negher e 24 bianch) o de un sistema de butun metüü giò crumategament. La butunera in furmaa orghen (o mudel piano) la gh'ha un metod d'üs del tüt inguaa a chel de un nurmal orghen, tütavia la dispusiziun vertical di tast ghe'n tira sö la dificultà d'üs e d'esecüziun. Chela lee l'è diferenta de chela del piano, sia per i carateristegh mecanegh de aziunament del tast, sia per corsa del tast (che l'è minur), sia per el fatt che la denamega di son (donca el so vulüm a nivel d'individuv) la ven no fada de la diferenta pressiun di did ins' el strüment ma l'è l'efett del devers temp de overdüra del mantess, e donca un'overdüra püssee lenta la farà sö un son püssee fiacch, menter de un'overdüra energega al vegnarà fora un son püssee fort.

Una fisarmonega diatonega in tant che la ven sunada.

La butunera cun sistema a butun, inscambi, al figüra 3, 4, 5 o 6 fil de butun, l'è ciamada fisarmonega a butun e de quajvölta in erur fisarmonega crumatega anca se pür che la version cun taster de mudel urganistegh l'è inguaa crumatega. A gh'henn difarent pusiziun de butun, i püssee spantegaa i henn el C-Griff (o sistema talian) e 'l B-Griff (sistema rüss).

A gh'henn pöj i fisarmonegh diatonegh, ciamaa anca armonegh a mantess (termen ch'al ven – in d'un teritori guvernaa de l'Impee Austriagh – de l'inflüenza lenguistega cunt el germanegh harmonika. Lümenanta l'esperienza del don Giuseppe Greggiati, che'l gh'ha lassaa in del mantuvan testimunianz storich incredibil in del so Metodo per l'armonica a mantice, scrivüü a man in del 1842, incö al se tröva a Ostiglia (MN) in del Fondo Musicale Giuseppe Greggiati e nünch püblegaa in del liber de l'Attilio Amitrano, Il Metodo per l'Armonica a Mantice di Don Giuseppe Greggiati (La Grafica, 2012). I armonegh a mantess i eren caraterizaa de un minur nümer de bass (generalment 2, 4, 8 o 12), del pudé sunà in möd facil duma in d'una quaj tunalità.

Chest strüment chì i henn tipegament bitonegh, var a dì in del schiscià l'istess butun i sunen do not devers in bas al vers del mantess (ch'al pö vess in overdüra o in sarament).

I fisarmonegh crumategh tradiziunal (sia a piano sia a butun) I henn inscambi strümencc ünitonegh (un butun al fa dumà una nota indipendentement del vers del mantess), anca se gh'henn strümencc ch'i sömea a la fisarmonega ('me un quaj Bandoneon) che anca se henn crumategh, donca permetten de sunà in tüt i tunalità, i henn a l'istess temp bitonegh.

El cör de la fisarmonega l'è 'l mantess, ch'al ven aziunaa del sunadur per fa vegnì dent assee aria a fà vibrà i anz. I anz i henn lam piscinin de asal, intunaa e cuntrulaa de valv ligaa insema a i tast, che in del vibrà fan sö el son; i anz i henn pöj fà sö in sö i soner, ch'i henn di suport de legn, e in bas al so timber i vegnen spartii in register. El register püssee bass al se ciama 16 e l'è traspuser, var a dì che sbassa giò la voltezza di son de un'utava, chel de mizz al se ciama 8 e chel volt al se ciama 4. L'8 e 'l 4 i henn no register traspuser, defat i cumbinaziun di register i vegnen metüü in orden del register püssee bass.

I fisarmonegh i pöden vegh clasifegà in tri grand categurij: fisarmonegh de liss, de cuncert e de stüdi. Ognedüna de chest categurij la gh'ha di carateristegh propi.

De solet una media fisarmonega de liss la gh'ha 3 vus a la man destra (utava basa, utava central, utava central batenta, donca un zicch stunada) e 5 a la destra, per chest la ven ciamada in terza e quinta. In gener chest fisarmonegh chì i henn culuraa cun culur devera sbalenaa e imbelii cunt scritt in madreperla. Chest per una question d'aspett.

A gh'henn anca strümencc de cuncert che i gh'han fin a 5 vus a la destra e 7 a la sinistra. I register i henn cumbinaziun de vus, var a dì chej lev in sö la cassa armonega ch'i müten istantaneament püssee vus in l'istess temp. Un quaj nomm de cumbinaziun ch'i se pöden catà föra i henn: Master (tüt i vus metüü denter); Bassoon (dumà utava bassa); Clarinet (dumà utava real); Flute (dumà utava real ma cunt un timber devers); Piccolo (dumà utava volta); Bandoneon (utava bassa + central); Violin, Musette, Voce celeste (utava central püssee un o dü register batent); Accordion (utava bassa + real + real batenta); Organ (utava bassa + real + volta). In termen püssee precis chej register chì i se ciamen 16-8-4 (master); 16 (bassoon); 4 (piccolo); 16-8 (bandoneon) ecc. i cumbinaziun de register müten in bas a la fisarmonega: i fisarmonegh de liss, cume chej de stüdi, i gh'han 7 register in media. I fisarmnegh de cuncert inscambi ghe n'han fin a 11, perchè in chest fisarmonegh al ven giöntaa de quaj völta l'utav cassott ch'a l'è un register del son uvataa e devera dulz. In di fisarmonegh de stüdi e in chej de cuncert gh'è no l'utava batenta per el fatt che tüt i utav i henn acurdaa a la perfeziun.

I fisarmonegh se spartissen in Bassi Standard e Bassi Deslenguaa in bas al funziunament de la butunera de la man sinistra: in di prim, cume giamò ditt de sura, la man sinistra la suna el cumpagnament (bass e acord), menter in di bass deslenguaa al gh'è un cunvertidur che 'l fa pussibil sunà nott singul cun la butunera sinistra, in möd de pudé sunà bindej cumpless a do man cume sö de un orghen o de un piano. Chela categuria chì de strüment l'è druvada suratüt de i cuncertista de müsega classega e la ven stüdiada in di cunservatori indue a l'è staa piazzaa dent el post per insegnà de la fisarmonega, metüü dent in di prugrama ministeriaj talian dumà in del 1993.

Regordumm el prim post de fisarmonega metüü dent a Pesaro del Maester Sergio Scappini che 'dess l'insgegna al Cunservatori Giuseppe Verdi (Milan). A gh'henn fisarmonegh ch'i hann sia i Bass deslenguaa che chej standard: in chej fisarmonegh lé la butunera sinistra la gh'ha di fil dedicaa a i bass deslenguaa e olter dedicaa a i bass standard.

El maester Salvatore di Gesualdo, professor al Cunservatori Cherubini de Firenze, l'ha scrivüü la vus fisarmonega in del "Nuovo Dizionario dell'UTET". A la fin di agn 2000 l'ha idejaa la fisarmonega de Cuncert "VI SdG", insema ad olter cumpusitur del dé d'incö, cume l'Adamo Volpi, el Lino Liviabella, el Luciano Fancelli, l'Efrem Casagrande, el Luigi Ferrari Trecate, el Vittorio Melocchi, el Gianfelice Fugazza, el Gervasio Marcosignori, el Bio Boccosi, l' Italo Salizzato, l' Astor Piazzolla e tancc olter, cunt i so cumpusiziun uriginaj e trascriziun di grand cumpusitur del '700, '800 e '900 gh'han dà 'na man e dervii i öss a i antich e növ sunurità. Cun l'evoluziun de la tecnologia, i henn staa faa sö tancc sistema eletronegh MIDI de apligà a i fisarmonegh.

In di temp antich[Mudifega | mudìfica 'l sorgènt]

Un strüment ch'al sömea tant a la fisarmonega, cunt i 'stess sistema mecanegh, a l'è staa faa sö in sö la bas de un prugett del Leonardo da Vinci, cuntegnüü in del codes Fol.76r del Codess Madrid II[1]. El strüment a l'è staa faa sö del liüter Mario Buonoconto, e sunaa in del Salone degli Stemmi del Münicipi de Castelfidardo, del fisarmonicista Denis Biasin. Il liutaio Buonconto l'ha inscì ditt: "Un disegn che nissön al cugnusseva fin al 1970, ma de che se'n sentiva 'l valur. De fatt, l'anticipa de bregh trisent agn l'invenziun de la fisarmonega. I indicaziun che el Leonardo l'ha lassaa i henn essenzial ma impurtant: una taster vertical, un mantess a dupia aziun che'l funziuna in tücc dü i vers, una serie de cann de legn o de carta, induve la genialità la se tröva in del genera una curenta d'aria che la fà son." [2]. El son de chela recustrüziun a l'è debon devers, perchè a l'è generaa de cann de legn. El strüment l'è staa lavuraa intregament a man; l'è staa metüü fö in esibiziun press el Museo Internazionale della Fisarmonica fina a la fin de l'ann 2009.

Riferimencc[Mudifega | mudìfica 'l sorgènt]

  1. La Fisarmonica di Leonardo da Vinci al Festival Internazionale Fisarmonica. 14 gennaio 2009. URL consultato il 21 ottobre 2009.
  2. La Fisarmonica di Leonardo Da Vinci. 16 ottobre 2009. URL consultato il 21 ottobre 2009.

Bibliugrafia[Mudifega | mudìfica 'l sorgènt]

  • Attilio Amitrano, Metodo per l'Armonica a Mantice di Don Giuseppe Greggiati del 1842, ed. La Grafica, Mori (TN) 2012, ISBN 9788897402114
  • Pier Paolo Sancin, Il libro dell'armonica, ed. Pizzicato, Udine 1990, ISBN 8877361832

Vus arent[Mudifega | mudìfica 'l sorgènt]

Ligamm de föra[Mudifega | mudìfica 'l sorgènt]