Ses bandere del Texas

Quell articol qì l'è scrivud in Lombard, cond l'ortografia Scriver Lombard.

I ses stema esponids sœ la façada del Texas State Capitol Dome

I ses bandere del Texas

"Six flags over Texas" (tr. Ses bandere sœl Texas) l'è ol mot dovrad per descriver i ses stats qe i ha havud la sovranitaa sœl territore del Stat american del Texas: Spagna (1519-1685; 1690-1821), França (1685-1690), Messic (1821-1836), la Republega del Texas (1836-1845), i Stats Confederads de America (1861-1865), e i Stats Unids (1845-1861; 1865-incœ).

Ol mot l'è dovrad ind i center comerçai, parc a tema e oltre imprese. A Austin, i ses bandere i sventola denanz al Bullock Texas State History Museum; ol Texas State Capitol al g'ha i ses stema sœ la façada nord, e l'University of Texas at Austin Life Sciences Library la g'ha tœts i stema. I ses bandere i è anc'pò sœl rovers del Seal of Texas.

Ind el 1997 la Comission Storega del Texas l'ha adotad di disegn ofiçai per rapresentar i bandere.

Spagna (1519 - 1685; 1690 - 1821)

La prima bandera l'è qella spagnœla; al temp però i era dovrade do version. Tœte do i g'hiva dent ol castell e leon, simboi de la Corona de Castilia. La bandera cernida da la Comission l'è qella dovrada da Carlo III de Spagna, coi bande orizontai ross-or-ross e ol stema semplis de Castilia e León. Qesta bandera l'è staita dovrada da la Spagna intra ol 1793 e ol 1931, e dal 1936 a incœ (qella d'incœ la g'ha però un stema divers).

• 
• 

França (1684 - 1690 per ol Fort Saint Louis e 1800 - 1803 come Louisiana francesa)

La segonda bandera l'è qella del Regn de França. Ind el 1684, un nobel frances (René-Robert Cavelier, Sieur de La Salle) l'ha fondad una colonia ind el golf del Texas ciamada Fort Saint Louis. La colonia l'ha mìa havud sucess e l'è staita abandonada dopo la so mort. In qell temp qé g'era mìa una bandera ofiçala in França, e donca i è stait dovrads plœ de un disegn per i ses bandere.

Plœ tarde, ind el XIX secol, la Spagna l'ha dait la Louisiana a la França col Terz Tratad de San Ildefons. La Louisiana francesa la g'era dent anc un toc de Texas. Ind el 1803 la França l'ha vendid tœt ai Stats Unids. La part texana l'è staita ridaita a la Spagna un qualc ann dopo.

Per l'Esposizion Centanala del 1876 l'è stait cernida qella bianca con tants fleurs de lys spantegads.

• 
• 
• 

Messic (1821 - 1836)

La terza bandera l'è qella del Messic. La so indipendenza l'è staita recognossida da la Spagna ind el 1821, e l'ha controllad ol Texas fina a la diqiarazion de indipendenza (1836). La bandera qe la rapresenta qesto periodo l'è una de qelle della Republega del Messic (1823-1864).

• 

Republega del Texas (1836 - 1845 come Republega del Texas; dal 1845 come Stat del Texas)

La quarta bandera l'è qella de la Republega del Texas. Ind la so storia n'è staite dovrade do: la Burnet Flag e la Lone Star Flag. L'ultema l'è deventada anc la bandera del stat federal american.

• 
  The Burnet Flag
• 
  The Lone Star Flag

Stats Unids (1845 - 1861; 1865 - incœ)

La bandera del cinq (e dovrada anc al dé d'incœ) l'è qella di USA, da quand ol Texas l'ha decidid de jontar-s insema ind el 1845. Dopo la secession, ol Texas l'ha adotad qella del ses, ma la fin de la guerra l'è retornad ind i Stats Unids.

• 

Stats Confederads d'America (1861 - 1865)

La bandera del ses l'è qella di Stats Confederads d'America, qe la g'hiva tre bandere nazionale. La plœ dovrada ind i ses bandere l'è la Stars and Bars.

• 
  The Stars and Bars
• 
  The Stainless Banner
• 
  The Blood-Stained Banner

Galleria

• 
  I ses bandere a Austin, Texas

Ligam de fœra

• The six flags of Texas - Handbook of Texas online
• Texas Almanac
• The Portal to Texas History
• Reverse of Texas State Seal
• Six Flags of Texas Arqiviad qé: [2]
• Texas State Preservation Board
• Texas Register (scroll down page to "Six Flags Over Texas" information on pages 5959–5967)
• The Republic of the Rio Grande Museum
• Mexico – Filibustering: Republic of the Rio Grande
• Origin of the Lone Star Flag of Texas Arqiviad qé: [3]