TheShow

Quest articol chì l'è scrivud in lombard, con la Noeuva Ortografia Lombarda

I TheShow a inn 'na cobia de youtuber e personagg televisiv italian, fada su de l'Alessio Stigliano (Milan, 4 sginer 1991) e de l'Alessandro Tenace (Milan, 10 marz 1991).

La cobia a l'è nassuda in del 2013 e l'è rivada a 'n gran success grazzia al format di esperiment sociai, ciapad di youtuber american.

Biografia[Modifega | modifica 'l sorgent]

I TheShow s'inn cognossud de fiolit, desgià che staven de cà in la midema cità, e sgiamò faseven di spetacolit indeperlor. Fann anca el licee insemma, per poeu separàss a l'università, anca se tucc e du vann a fà el Politecnegh de Milan.

In l'otober 2013 derven el sò canal YouTube e publeghen el sò prim video, "maner de andà a proveder alternative", che 'l deventa a la svelta un video viral, e inn stad i prim a portà al success in del publegh italofon el format di esperiment sociai.

Per du agn de fila a inn premiax ai Web Show Awards 'me "Rivelazzion" in del 2014 e "Top Prank" (Scherz Pussee Bon) in del 2015.

In del 2016 riven al milion de iscrit e dann foeura el sò liber, "Fallo", indova che parlen di sò tecneghe per superà l'ansia e ciapen part a Pechino Express in del team "I socialisti" e vincen.

In del 2017 a inn inviad del programa Rai Nemo - Nessuno escluso e de Social House, indova che restruturen 'na veggia cà per trasformàlla in d'on spazzi de agregazzion.

El 29 de masg del 2020 inn cusad de fà finta de vesser di "assistent civegh", o ben di sorveliant volontari insubid poch prima del minister Francesco Boccia per fà respetà i norme de distanziament social per el COVID-19, cont una petorina e on badge fàls del comun de Milan, e sarien andad dent in d'on bar indova che havarien fad s'ciopà on petard in sul desch per poeu menascjà de fà 'na multa al barista. Inn poeu denonziad de la Polizzia de Stat per usurpazzion de titoi el prim de sgiugn.

El 31 de masg 2023 dann foeura un video indova che mostren che, in realtà, hann fad un scherz propi de nagot, cont el meter una micceta in su 'n tavolin foeura indova che du parlaven senza mascherina, e poeu l'è stad picad quell che l'ha fad el scherz.