Wikipedia:Politeghe di nazzionalità

Quest articol chì l'è scrivud in lombard, con la Noeuva Ortografia Lombarda

Al dì d'incoeu, a l'è facil dì la nazzionalità, l'è assee vardà al passaport, ma gh'è di cas controvers. Con l'andà indree in del temp, inveci, a gh'è vari cas indova che l'è propi gram catà una nazzionalità precisa.

El consili l'è quell de doperà semper el bon sens e de scoltà la comunità. 'Sti linie guida chi poden dàv una man a scernì.

Nazzionalità in di temp indree

Italia, Germania e cas arent

A diferenza de alter edizzion lenguisteghe, la Wikipedia in lombard la dopera "italian", "todesch" e compagn domà per parlà di nazzion che s'inn formade 'me Stat a mità 1800: con bonsens, se poden doperà vers la mità/fin del '700, a tegnì anca a ment l'identifegazzion del soget e indova l'è che l'ha vivud pussee: per esempi, el Carlo Cattaneo l'è de sigur italian, menter el Carlo Ghega l'è austriegh.

Prima de 'sto period, se poden doperà di agetiv pussee generai, tant 'me "italegh" o "germanegh", o se gh'è di classifegazzion pussee precise se poden doperà quelle (bavares, lombard, svev, napolitan ecc.)

In di cas pussee dubi, se po anca sgiontà la citadinanza (per esempi: "l'è un politegh italian, citadin de l'Imperi austriegh").

Nazzionalità controverse incoeu

In linia de massima, al dì d'incoeu, la nazzionalità de vun la correspond a la soa citadinanza. Se 'l gh'ha de sens, comunque, se po sgiontà una linia per meter in ciar l'identifegazzion etnega de vun.

Di cas indova che 'l consiliom a inn:

1. Leader independentista, autonomista e separatista
2. Rilevanza per l'etnia in question
3. Sgent che l'è ligada a l'etnia per reson politeghe o culturai
4. Stat plurinazzionai

Per esempi:

• Vinzenz Peristi: El Vinzenz Peristi (Sacon, 19 de november 1909 - Russia, 25 de sginer 1943) a l'è stad un scultor e alpinista italian de etnia ladina (criteri 2)
• Ramzan Kadyrov: El Ramzan Achmadovič Kadyrov (russ: Рамзан Ахмадович Кады́ров, Tsentaroy, 5 de otober 1976) a l'è un politegh russ de etnia cecena (criteri 4)
• Denis Pušilin: El Denis Pušilin (Makiivka, 9 de masg 1981) a l'è un politegh e militar ucrain de etnia russa, capo de Stat de la Republega Popolar de Doneck, Stat a recognossiment limitad (criteri 1)

Di ecezzion se poden fà, in general, se gh'è di alter Wikipedie che 'l fann e se 'l gh'ha de sens. Di esempi inn:

• freiheitskämpfer sudtiroles
• Sgent di nazzionalità storeghe de la Spagna, se l'è ciar che se identifeghen pussee in la soa nazzionalità che in quella de la Spagna

A l'è semper possibel schivà la nazzionalità in del test, se l'è mej fàll. Per esempi, inveci de:

	«El Topo Lin (Paperopol, 23 de masg 1955) a l'è un politegh paperinian, capo del Moviment Secessionista di Rat. Cont i rebellot in Paperinia del 1997, l'è fad capo suprem de la Republega Democratega di Rat, stat a recognossiment limitad che l'è recognossud domà de la Topolinia»

Se po scriver:

	«El Topo Lin (Paperopol, 23 de masg 1955) a l'è el capo del Moviment Secessionista di Rat che, cont i rebellot in Paperinia del 1997, l'è fad capo suprem de la Republega Democratega di Rat, stat a recognossiment limitad che l'è recognossud domà de la Topolinia»

Inscì, se schiva el meter una nazzionalità.

In d'ogni cas, per definì quella che l'è una "nazzion senza Stat" se va adree al criteri che l'è doperad de la Wikipedia in ingles:

1. La gh'ha nissun Stat so
2. L'è minga magioranza in d'un Stat
3. A gh'è di moviment autonomista o secessionista cognossud
4. L'è minga recognossuda 'me Stat de 'n Stat de l'ONU

Categorizazzion

Foeura che in di cas che gh'è una categoria aposta, a gh'è comunque de doperà la categoria pussee vesina a la nazzionalità de incoeu. In di cas controvers, se poden meter anca i categorie per pussee de nazzionalità, per esempi in Denis Pušilin.