El Sesto 2012 a l’è ona squadra de folber de Sest San Giovann ch'a l’è stada fondada adree a l’idèa d'on grupp de des amis in del mes de marz del 2012 cont el nòmm de ASD Football Sesto 2012. El primm president de la squadra l’è staa el Lu Rong Yi, on impresari e titolar d’on bar originari de Lucheng in Cina, e l'è staa el primm president cines d’ona squadra de folber italiana. [1][2]
La squadra l'ha comenzàa la soa attività in del mes de luj del 2012 innanz de la stagión 2012-2013. [3] In quell’ann là la squadra l’ha giugaa (cont el nòmm de "Football Sesto 2012" mantegnuu fin la fin del stagion 2017-2018 innanz de ciamass domà "Sesto 2012") in tèrza categoria. L'è stada promòssa a la fin de la soa primma stagión in segonda categoria. [4]
in del 2014 l'è stàa cambiàa el presidént, quand che ‘l Lu Rong Yu l’hà decidùu de dà nò a ficc el bar del center sportiv. El bar l'era staa tiraa in pee de lù medesim e poeu bandonaa dòpo che l’aveva minga rispettàa i sò dover cont el comun. La reson probabil de quèsta soa scèrna chì l’era che lù, che l’era el proprietari d'on bar arent el gh'aveva paura de la concorrenza. La riunion di sòci l’hà inscì deciduu de desfesciall, e de mètt al sò pòst l’Alessandro Bertinazzi[5][6][5][7] El bar del center sportìv l’è staa poeu incendiaa l’ann adree in del magg del 2016. El foeugh l’è staa de origin maliziosa. [8][9]
La squadra l’è migliorada de maneman, in del 2015 l'ha mancaa i playòff a l’ultim moment, [10] ma l'è stada promòssa in prima categoria l'ann adree, a la fin de la stagion 2016-2017.
El stadi indoe el Sèst el giuga l’è compres in del Center sportiv Boccaccio del comun de Sest San Giovann che’l gh’ha denter 2 camp a cinch, vun a sètt e on camp a vundes in èrba sintetica fàa in del 2017, che l'è quèll dopraa del Sesto 2012 per i sò partid. Incoeu el giuga in primma categoria.
I color sociaj hinn el bloeu, el bianch e l'arancion. [17]
L’arancion incoeu el ven minga dopraa; l’è staa dopraa soratutt in di temp indree quand che la squadra la gh'aveva el nòmm de "Football Sesto 2012". [18]
