Saxifraga arachnoidea

De Wikipedia
Jump to navigation Jump to search
Chest artícol a l'è scricc in Lumbàrt Orientàl, ortograféa unificàda Lombard oriental
Saxifraga arachnoidea
Saxifraga arachnoidea - img 1786.jpg
Classifigazion sientífiga
Regn: Plantae
Division: Magnoliophyta
Clas: Magnoliopsida
Ùrden: Saxifragales
Famìa: Saxifragaceae
Zèner: Saxifraga
Spéce: S. arachnoidea
Nomm binomial
Saxifraga arachnoidea
Sternb.

Saxifraga arachnoidea l'è 'na piànta de dimensiù picinìne de la famìa de le Saxifragaceae. L'è endémica dei mucc de le prealpi bresàne e del trentì meriudiunàl.

Descrisiù[Modifega | mudìfica 'l sorgènt]

La fùrma biologica l'è: Ch rept - Camèfite reptante. Piànte che g'ha i böcc che pàsa la stagiù frèda colocàde a mìa de piö de 20 ghèi del teré e che g'ha portamènt bas, che rèsta dré a tèra.

Piànta perène, de aspèt delicàt, àlta de 10 a 25 ghèi, coi gambì fì fì, prostrat-ascendèncc, de culùr vért smórt, töcc enciurciàcc sö 'ndèna rét spèsa de péi ghiandulùs biànch che la piànta la dopèra per tratègner l'ümidità de l'ària e demenöéser la traspirasiù; i gambì i è mìa 'ngrosàcc ai gróp.

Saxifraga arachnoidea - img 1787.jpg

Le fòie i è töte piéne de péi bianch-lanùs ghiandulùs, chèle de la part bàsa de la piànta le g'ha 'n gambì cürt cürt, la làmina l'è obovàda-rómbica, con 3 décc otùzi; le fòie de la part piö àlta le se 'nsömèa a chèle de la part bàsa ma i è piö pesène e le g'ha quàze mìa de gambì (sub-sèsii).

I fiùr i è de 'n culùr zàlt ciàr o quàze biànch e i è furmàcc de sich pétali piö o méno rotóncc, 1,5÷2 × 2÷3 mm e de sich sépali con décc del càles a fùrma ovàl piö strècc e piö cürcc dei pétali. De sòlet en vé fò giü apéna per ògna gambì. I fiorés entrà i més de zögn e óst.

El fröt l'è 'na càpsula de 3,5÷4,5 ghèi.

Ambiènt[Modifega | mudìfica 'l sorgènt]

L'è 'na piantìna che crès 'ntra i 700 e i 1900 méter s.l.m. sö teré calcàrei, a tèt dei pridù che ànsa fò a strapiómp (cuèi, ripàr natürài), endóche le rèsta schiàde de le 'ntempérie e 'ndóche sóta se fùrma 'na sórt de girulìna che se mès•cia sö ai rèscc orgànich làsacc endré de le càvre.

'N ilüstrasiù del 1882

La S. arachnoidea l'è 'n paleo-endemìsmo scampàt a le glaciasiù amò de l'época tersiària e riàda ai nòscc dé 'n stasiù 'ndóche l'è riàda a riparàs, söi pich che ansàa sö dei ghiaciài.

Commons-logo.svg
Wikimedia Commons
al gh'a dent roba culegada a: