Sandro Botticelli

Quest articol chì l'è scrivuu in lombard, grafia milanesa.

Supposuu autolitratt del Bottesell ind el sò Adorazzion di Magh (1475)

L’Alessandro di Mariano di Vanni Filipepi (z. 1445 – 17 de masg del 1510), mej cognossuu coma Sandro Botticelli, o nomà coma el Bottesell, l’era on pencior fiorentin attiv adree al Primm Renassiment. La sò reputazzion pòstema l’ha soffrii infina al segol quell di 19, quand che l’è staj redescovert di pencior prerafajelitta; de inlora, i sò picciur hann representaa la grazzia liniara del Gòtegh Tard e de on quaj quader del Primm Renassiment.

In sgionta ai sogett mitològegh per i quaj l’è pussee famos al dì de incœu, el Bottesell l’ha depensgiuu ancasì tanc sogett religios e pœu anca on quaj litratt. I sò œuver pussee zeleber inn El nassiment de la Vener e Primavera, tucc dò guarnaa ind la Galaria dei Offizzi a Fiorenza, indova che gh’è pròppi tanc lavorà del Bottesell. El Bottesell l’ha vivuu per tutta la sò vita ind l’istess rion de Fiorenza e el s’è menaa fœura de la zitaa nomà per on quaj mes, soratutt per depensg di lavorà a Pisa ind el 1474 e la Cappella Sistina a Ròma intra el 1481 e el 1482.

I agn ’80 del 1400 inn el desenni indova l’è staj pussee produttiv: la sò reputazzion la s’è impennada e l’ha faj fœura tanc œuver a tema mitològegh e ona quaj representazzion de la Madòna. A rivà ai agn ’90, el sò stil l’era deventaa pussee personal; ind i sò lavorà darree es ved che l’haveva ciappaa ona direzzion opposuda a quella del Leonardo da Vinci – che l’era sett agn pussee sgioven de lu – e dei òlter pencior ch’hann faj su la nœuva sgenerazzion de l’istil del Vòlt Renassiment, cont el tornà indree a on istil ch’el pœu vess mej descrij coma “gòtegh” o “arcajegh”.

Ligamm de dent

• El nassiment de la Vener
• Primavera

Ligamm de fœura

Altri progetti

• Wikiquote
• Wikimedia Commons

• Wikiquote el gh'ha dent citazzion de o su Sandro Botticelli
• Wikimedia Commons el gh'ha dent imagin o alter archivi su Sandro Botticelli