Rumàn Capitel Növ

Quel articul chì l'è scrivüü in Lumbard, cun l'urtugrafia insübrica ünificada.

Rumàn

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Növ

¹Disi la veritaa in del Crist, a disi minga büsì, e la mia cuscénza la da testimunianza insèma in del Spirit Sant, ²che gh'huu granda tristéza e dulúr sénza cessà in del mè cör. ³Già che desideravi vèss mì medemm anatema del Crist per i mè fradèj, i mè parént segund la carna, ⁴che hinn Israelìtt, de quij l'è l'aduziún, la gloria, i acordi, el dà de la lég, el servizi divín e i prumèss, ⁵de quij hinn i pader e de quij segund la carna l'è 'l Crist, che l'è Diu suta tüsscoss, benedii per semper, amén.
⁶E no in de nissüna manéra l'è che la parola de Diu l'ha burlaa giò via, già che no tücc quij che hinn de l'Israel hinn l'Israel; ⁷né che tücc i bagaj hinn la suménza de l'Abraham, ma «In de l'Isach la te sarà ciamada una suménza». ⁸L'è de dì, i bagaj de la carna hinn no i bagaj de Diu, ma i bagaj de la prumèssa hinn cunsideraa cuma la suménza. ⁹Già che chèst l'è la parola de la prumèssa: «In de chèst témp vegnaruu e la Sara la gh'avarà un fiöö». ¹⁰E no dumà chèst, ma anca la Rebeca l'ha cuncepii de vün Isach, noster pader; ¹¹già che quand hinn minga anmò staa nassüü né hann faa quajcossa bona o cativa, perchè 'l pruposit de Diu segund l'eleziún el resta, ¹²no di laur, ma de Lü che 'l ciama, el gh'è staa dii: «El magiúr el servarà 'l minúr», ¹³propi cuma l'è scritt:
«Huu vursüü bén Giagum, e huu udiaa Esaú».
¹⁴Dunca, che cossa dirèmm? La gh'è l'ingiüstizia arént a Diu? Che la sia no! ¹⁵Già che 'l dis a Musè: «Gh'avruu misericordia de chissessìa a gh'àbia misericordia, e gh'avruu cumpassiún de chissessìa a gh'àbia cumpassiún». ¹⁶Dunca, l'è no de lü che 'l vör né lü che 'l curr, ma de Diu che 'l gh'ha misericordia. ¹⁷Già che la Scritüra la dis a Faraún: «Propi per chèst t'huu dessedaa, per fà vedüda in de tì la mia puténza, e perchè 'l mè nomm el sia pruclamaa in de tüta la tèra». ¹⁸Dunca, el gh'ha misericordia de chi Lü 'l vör, e 'l fa dür chi Lü 'l vör.
¹⁹Dunca, te me diree: «Perchè 'l tröva anmò difètt, già che chi 'l pò resist la sua vuluntaa?» ²⁰O vèss üman, al cuntrari, chi te see tì, tì che te cuntradiset Diu? La roba furmada la dirà a lü che 'l l'ha fada: «Perchè te m'hee faa inscì?» ²¹O el vasee 'l gh'ha minga auturitaa sü la crèja per fà del gnocul el vas per l'unúr e 'l vas per el desunúr? ²²E se, perchè Diu el vör fà vedüda l'ira e fà cugnussüda la sua puténza, l'ha supurtaa, cun tanta paziénza, vas d'ira preparaa per la destrüziún, ²³per fà vedüda la richéza de la sua gloria vèrs vas de misericordia che l'ha preparaa prima per la gloria?
²⁴Chèst, nümm, che l'ha ciamaa, no dumà di Giüdee ma anca di naziún, ²⁵cuma anca in d'Osea el dis:
«Ciamaruu chèla che l'è no la mia gént la mia gént
e chèla che l'è minga vursüda bén vursüda bén;
²⁶e 'l sarà in de lögh due 'l gh'è staa dii:
tì te see minga la mia gént,
là sarànn ciamaa fiöö de Diu vivent».
²⁷E Isaia 'l cria sü l'Israel:
«Se el nümer di fiöö d'Israel l'è cuma la sàbia del mar,
el rèst el sarà salvaa».
²⁸Già che 'l Signúr el farà una roba sura la tèra, cumpletandula e finendula sveltamént. ²⁹E propi cuma l'Isaia l'ha dii prima:
«Se 'l Signúr di esèrcit el m'ha lassaa dedree una suménza,
sarìum devegnüü cuma Sodoma,
e sarìum faa cumpagn de Gomora».
³⁰Dunca, che cossa dirèmm? Che i naziún, che cercaven minga la giüstizia, hann ricevüü la giüstizia, e giüstizia che l'è de la féd, ³¹e Israel, che 'l cercava la lég de la giüstizia, l'è minga rivaa a la lég. ³²Perchè? Perchè l'è no de la féd, ma cuma di laur de la lég; hann scapüsciaa in de la prèja del scapüsc, ³³cuma l'è scritt:
«Vardee, a meti in de Siún una prèja de scapüsc
e una roca de scandul,
e lü che 'l cred in de lü el sarà minga faa vergugnús».

Navigaziun

• ← Indree a Capitel Vott
• Inanz a Capitel Des →
• A l'indes