Republega Serba (Bosnia e Erzegovina)

La Republega Serba de la Bosnia e Erzegovina (Република Српска in serb, in abecee latin Republika Srpska) a l'è vuna di do entità autonome che fann su el Paes balcanegh insema a la Federazzion de Bosnia e Erzegovina: a magioranza serba, la quata pu o men el 49% del territori nazzional e la gh'ha el 33% di abitant del Paes.

Formalment la soa capital l'è Sarajevo, ma i so ofizzi de governa inn a Banja Luka: la gh'ha circa 1,3 milion de abitant, de che 1,1 milion inn serb, dopo de la netada etnega di guerre jugoslave la popolazzion di alter etnie la s'è sbassada propi tant. In principi la se definiva 'me la republega di serb e di alter popoi, ma poeu la Cort costituzzional bosniaca l'ha scassad quella forma chi, e l'è deventada pu espression di serb, tant che la gh'ha havud anca de cambià inn, de Bože Pravde, che l'è anca l'inn de la Serbia, a Moja Republika.

El nom Srpska a l'è una formazzion noeuva che la scomincia de srb, radis de "serb", e ghe taca "ska", sistema che in serb l'è despess doperad per fà su i nom di stat. L'è dent a la Bosnia e Erzegovina a partì del 1995, quand che i acord de Dayton hann mitud fin a la guerra e gh'hann dad l'autonomia a l'entità serba e a quella croat-bosniega.

El so president a l'è el Milorad Dodik, gh'è un governo e 'n Assemblea Nazzional: fina al 2004 la gh'era anca 'n Armada, tacada poeu a quella federal.

L'è spartida in set region: Banja Luka, Doboj, Bijeljina, Vlasenica, Sarajevo-Romanija, Foča e Trebinje; formalment la gh'ha el distret de Brčko in condomini con la Federazzion, ma in di facc a l'è una soa entità deperlee.