Peder II del Brasil

Quest articol chì l'è scrivud in lombard, con la Noeuva Ortografia Lombarda

El Peder II (2 de desember del 1825 – 5 de desember del 1891), cognossud ancasì con la scormagna de ‘el Magnanem’ (portoghes: o Magnânimo),^[1] l’è stait el segond e darer monarca de l’Imperi del Brasil. L’ha regnad per pussee de 58 agn.

El Peder l’è nassud a Rio de Janeiro coma el bagaj quell di set de l’imperador Peder I del Brasil e de la sò fomna, la Maria Leopoldina d’Austria; a l’era, donca, un member del ram brasilian de Cà Braganza. L’abdegazzion del sò bobà e el sò departiment per l’Europa ind el 1831 haveven lassad a assa bruta el fiolin de zinch agn a caregàss del rœul de imperador; de conseguenza, de bagaj e sgiovinot a l’era propri soll sollent, desgià che el gh’ha havud de passà tant temp a studià tuscoss per vesser bon de menà inanz la nazzion. I sò sperienze cont i gamine de cort e i beghe politeghe duranta quell period chì gh’hann havud un gross efet in sul sò carater de grand: l’è vegnud su ind un hom cont un bell sens del dové e tanta devozzion per el sò pajes e popel, ancaben che el sò rœul de monarca el ghe sgenass semper pussee.

Sò pader el gh’haveva passad sgiò un imperi adree a borlà sgiò in milla toch, ma el Peder a l’è riessid a voltà el Brasil ind una potenza emersgenta ind el panorama internazzional. La nazzion la s’è spartida fœura di sò vesin ispanofen, soratut ind la stabilitaa politega, libertaa de parolla, respet per i drizz zivii, visquer cressiment economegh e forma de goveren: una monarchia constituzzional che la fonzionava propri ben. El Brasil l’haveva anca apena venc la Guerra de la Plata, la Guerra uruguajana e quella paraguajana, e prevalid in tante oltre beghe intenazzionai e tension de carater domestegh. El Peder l’ha fait passà l’abolizzion del s’ciavisem amalastant de l’oposizzion de part de dei interess economegh e politegh propri gajard. L’è stait bon de fosgiàss una reputazzion de gross finanziador de l’imprendiment, cultura e di zienze, e el s’è gadegnad el respet e remirazzion de dei intelletuai compagn del Charles Darwin, Victor Hugo e Friedrich Nietzsche; de sora maross, a l’era amis del Richard Wagner, Louis Pasteur e Henry Wadsworth Longfellow, intra tancc olter.

L’imperador l’è stait detronizad a assa bruta ind un colp de stacc che asquas el gh’haveva minga de sostegnidor de de fœura del sgir de comandant militar che l’haveven trait in pee, e che voleven una republega menada inanz de un ditador. El Peder l’era strach de fà l’imperador e el fava fadiga a vedégh un futur per la monarchia, ancaben ch’el fudess assossenn popolar. L’ha minga volsud che se se oponess a la sò espulsion e l’ha sostegnud nissun tentativ de fà tornà a voltra la monarchia. L’ha passad i sò darer agn de vita in esili in Europa, indova el viveva indeperlù con poch daner.

El regn de Peder II l’è fenid intanta che l’era al comel de la sò popolaritaa, e de lì adree el Brasil l’è fondad sgiò ind un longh period de malgoveren, ditadure, e cris economeghe e constituzzionai. Paradossalment, i homen che haveven esiliad el Peder hann tacad a la fenitiva a tœùll a modell per la republega ch’i voleven fà su.

Refarenze

↑ Barman, Roderick J. (1999). Citizen Emperor: Pedro II and the making of Brazil, 1825–1891. Stanford: Stanford University Press. ISBN 978-0-8047-3510-0.

Olter proget

Wikimedia Commons el gh'ha dent imagin o alter archivi su Peder II del Brasil

[Barman-1] Barman, Roderick J. (1999). Citizen Emperor: Pedro II and the making of Brazil, 1825–1891. Stanford: Stanford University Press. ISBN 978-0-8047-3510-0.

[1]