Papers, Please
Papers, Please (Palpee, grazia in lombard) l'è on videogioegh independent s'ceppacoo desviluppaa dal Lucas Pope, che 'l parla de la vita de on ispettor de la dovana in del paes inventaa de Arstotzka. El gioeugh l'è staa relassaa el 8 de agost del 2013 per el Windows e 'l OS X, in del 12 febrar 2014 per el Linux e 'l 12 de dicember 2014 per l'iPad.
El gioeugh[Modifega | modifica 'l sorgent]
El gioeugh l'è incentraa in sul lavorà d'on Ispettor de la dovana de la nazion inventada de Arstotzka, despoeu la fin de ona longa guerra cont el Stat confinant de la Kolechia. El post de blocch l'è in tra el confin de la cittaa dividuda de Grestin e 'l serviss a tegnì foeura del Paes terrorista, sfrosador, criminaj e personn senza i palpee bon. Al principi la gabina del giugador la gh'ha domà el timbro per accettà o refudà l'entrada, ma poeu el podarà doperà di noeuv ròbb, per esempi el timbro cont el motiv de refud e la ciav per el s'ciòpp.
Se cont i arnes a soa disposizion el troeuva di discrepanz el pò refudà l'entrada (per esempi se quell che 'l voeur vegnì dent el gh'ha i palpee descaduu), controllà pussee attentament cont el body scanner, i impront digitai e i nomm in de l'archivi. Se 'l troeuva di olter discrepanz, 'me on nom fals o on document rubaa, el pò refudà l'entrada o, despoeu el dì 5, ciamà i Guardij e menà via 'l soggett.
Quand che l'ispettor l'ha deciduu se fà passà o nò el richiedent e lu el va via da la gabina el descovriss se l'ha sbajaa o nò. Al terz error el ciappa ona multa.
A la fin de ogni dì l'ispettor el gh'ha de scernì 'me spend i sò danee: El gh'ha semper de pagà el ficc, e 'l pò anca mett el rescaldament e 'l mangià. Gh'hinn anca di spes straordinari 'me i medesinn, di cadò per el fioeu e di miôrij per la gabina d'ispezion. Se 'l da mia de mangià ai sò parent pòden malàss, e se hinn malaa per tant moeuren. Se tucc i parent moeuren el gioeugh el finiss.
Vist che i relazion in tra l'Arstotzka, paes a regim comunista, e i paes arent se s'céppen despess a hinn mettuu semper di noeuv restrizion, 'me di noeuv document, permiss o ordin de controllà tucc i gent de ona determinada nazion o anca de lassà foeura tucc i imigraa de on determinaa Paes. In del primm dì del gioeugh domà i cittadin de Arstotzka pòden vegnì in del Pajes, e i forestee i gh'han de vess lassaa foeura.
Ma l'ispettor el gh'ha anca de analizzà di "cas uman", 'me di person che vegnen in Arstotzka per curàss da ona malattia grama senza el permess, miee de ona persona entrada regolarment ma senza palpee e via inscì.
Gh'hinn anca di personagg ricorrent: El pussee important l'è 'l Jorji Costava, che 'l deventa amis de l'ispettor e ghe dà la possibilitaa de scappà da Arstotzka in di ultim di del gioeugh, quand che la situazion la deventa grama.
Gh'è anca ona sociazion sovversiva, ciamada orden de la stella EZIC, che 'l voeur sovvertì el regim de Arstotska, e che pò fàll domà cont el jutt del ispettor che 'l gh'ha de ammètt in del paes i òmen de l'EZIC e coppà e cascià via quej che pòden mett in pericol i operazion de l'orden.
El gioeugh el gh'ha 20 finai divers, e domà vun el dà la vittoria e 'l còdes per giugà a l'edizion senza fin. Tucc i nazion pòden dà on token, ossia on getton, se l'ispettor el fà vergòtt de bon in di confront de on cittadin de quell paes.
Desvilupp[Modifega | modifica 'l sorgent]
Papers, Please l'è staa desvilupaa dal Lucas Pope, vegg desvilupapdor de la Naughty Dog che ha lassaa per diventà on desviluppador indipendent. Programmaa cont di software open source in sul Mac 'me progett de fà in ses mes, a la fin el gh'ha avuu pussee popolaridaa de quant el Pope el speciava, e el gh'ha avuu bisogn de 9 mes.
'Me american che 'l viv in Giappon e donca el gh'ha de passà despess in tra i controj de l'immigrazzion e de la dovana, esperenza che lu 'l definiss "inquietanta", e l'ha pinsaa che 'l se podeva voltà in d'on gioeugh divertent. Despoeu ona raccolta de nom per i personagg del gioeugh l'ha mandaa in del Steam Greenlight el 11 de april del 2013 e l'è staa approvaa el 1 de magg.
El gioeugh l'è staa voltaa per l'iPad e l'ha pinsaa anca ad ona version per PS Vita, annonziada in del 2014. Quand che l'ha mandaa al App Store la Apple l'ha voruu nò l'opzion per la nuditaa, ritegnuda pornografega e donca ha refudaa l'applicazzion. Despoeu ha dii che l'è stada ona "incomprension" e ha accettaa l'app con l'opzion nuditaa.
Durant del desvilupp l'aspett del gioeugh l'è staa mudaa on poo de volt e hinn staa cavaa via anca di fonzion, 'me quella de confiscà i scansion del corp per poeu vendij, vist che la confisca di passaport l'è diventada on element central e anca drammategh del gioeugh.
Reazion del publegh[Modifega | modifica 'l sorgent]
L'è staa on videogioeugh assee apprezza dal publegh, e anca da la critega, cont on vot medi de 9/10. Di giornai l'han ciamaa "gioeugh del 2013", "gioeugh che 'l pò cambià la toa ideja quand che te set in fila al reoport" e anca on gioeugh cont di scern morai assee important.
L'ha vengiuu on poo de premi per la storia, el design, l'innovazion e la simulazion pussee bella.