Ospedaa de Suzzara

De Wikipedia
Lumbard ucidental Quest articol chì l'è scrivuu in lombard, grafia milanesa.
La veggia sed de l'Ospedaa

L'Ospedaa de Suzzara a l'è 'n ospedaa publegh a gestion privada a Suzzara, cont on basin de utenza in trii provincc: Mantoa, Modena e Regg Emilia.

Storia[Modifega | modifica 'l sorgent]

Costruzion[Modifega | modifica 'l sorgent]

L'è staa vert in del dicember del 1854 grazia a 'na donazion fàda in del 1853 del Pietro Montecchi in del sò testament, in di locai de la veggia deputazion, che incoeu a hinn municipi, con 10 post lecc.

In del 1855 el fradell del Pietro, el Carlo, l'ha donaa di danee a l'ospedaa e, mort l'ann dopo, gh'ha molaa 'na generosa somma in del testament, ciovè on quart di sò patrimoni.

L'ospedaa l'è staa donca bon de slargàss in d'ona noeuva sed in Piazza Castell, doperada poeu 'me sed del Partii Comunista Italian. El trasferiment l'è faa in del 1860 e in del 1866 el riva a 20 post lecc.

In principi ministraa 'me de testament di Pii Loeugh de Suzzara, del 1855 al 1874 l'è ministraa de 'n ministrador unegh, menter del 1874 l'è gestii de la Congregazion de la Carità, grazia ai noeuv legg del Regn d'Italia in sul tema.

La congregazion la slarga l'ospedaa, che 'l riva a 24 lecc, e la restruttura tuscòss. in del 1885 l'è deciduu de slargàll per soddisfà i besogn de quej de Suzzara e l'è restrutturaa in del 1887-1888. Dopo del 1900 l'è vert on repart de cerusia e i post lecc deventen 54: l'è anca verta 'na farmacia e 'l servizzi l'è estes anca per quej che viven minga a Suzzara.

In del 1924 l'è istituii el servizzi de autolettiga e in tra el 1928 e 'l 1931 l'è fàda su 'na gesetta taccada a l'ospedaa.

Civilizzazion[Modifega | modifica 'l sorgent]

In del 1944 l'ospedaa el deventa 'n "Ospedaa Civil", ma l'è danegiaa fiss di event de guerra e i todesch gh'even robaa 'n mugg de ròba, donca i ministrazion gh'han avuu de refinanziàll e sistemàll.

In del 1969 l'è deciaraa Ospedaa de Zona e in del 1978, con l'istituzion del Servizzi Sanitari Nazional, l'è miss 'me U.S.S.L numer 49, deventada poeu l'U.S.S.L 22 Ostija-Suzzara in del 1995. Con la reforma del sistema socio-sanitari de la Lombardia del 1997 el deventa part de l'Azienda Ospedalera "Carlo Poma" de Mantoa.

In del 1997 la veggia struttura, voramai puu adatta, l'è sarada e i malaa a hinn trasferii in la noeuva struttura in la periferia de la città. In del 2005 l'ASL de Mantoa la se accorda cont el Comun per sbatt giò 'na part del vegg ospedaa per fà su di cà e tutelà la veggia 'me center di vegg e offizi ministrativ.

Gestion privada[Modifega | modifica 'l sorgent]

In del 2003 la Region Lombardia la crea la Fondazion Fradej Montecchi che la da in concession l'ospedaa a l'azienda privada KOS in d'ona gara publega fàda in del 2004, che la gh'ha avuu de restrutturà la struttura e inserìgh on dipartiment de riabilitazion.

Incoeu la struttura la gh'ha 130 post lecc, de che 30 reservaa per la riabilitazion. La concession la gh'ha scadenza in del 2022 e l'è vun di primm esempi de 'na roba del gener in Italia.

Riferiment[Modifega | modifica 'l sorgent]

Vos corelaa[Modifega | modifica 'l sorgent]

Ligamm de foeura[Modifega | modifica 'l sorgent]