Ospedaa San Giusepp (Milan)

De Wikipedia
Lumbard ucidental Quest articol chì l'è scrivuu in lombard, grafia milanesa.
El vegg ospedaa

L'Ospedaa San Giusepp a l'è 'n ospedaa de Milan privaa ma part del Servizzi Sanitari Regional in la zona de Sant Ambroeus.

Stòria[Modifega | modifica 'l sorgent]

A l'è staa fondaa in del 1874 de la Provincia Lombardo-Veneta di Frati (italian: Fatebenefratelli) con la benedizion del Papa Pio IX, e l'è staa piazzaa in di svesinanz de la Basilega de Sant Ambroeus per quèlla reson lì. Al temp a Milan gh'eren àlter du ospedai de l'Orden.[1]

In princìpi el nass 'me loeugh per juttà i malaa cronegh pussee pover ma in del 1866, cont i legg del Bettino Ricasoli che limitaven el poder di religios, caven via el dirizz di proprietà ai Frati e resten domà 'me personal.[1]

In di agn dòpo la struttura la se derva pussee a trattà i malaa de 'n Milan che 'l cress e la derva 'na sezion per i malaa de tisi. L'è slargaa assee finna ai primm agn del '900, tant de deventà 'n ospedaa militar durant de la prima guerra mondial.

In del 1923 a l'è verta dent 'na farmacia publega e 'n repàrt de maternità, che l'è staa faa in risposta ai politegh di fascista de natalità.

In di bombardament di Liaa el resulta destrugaa el 15 de agost 1942 e gh'hinn vorsuu 10 agn per fàll su ancamò, ma in del frattemp a l'è slargaa e cont i sò 300 lecc in del 1952 el deventa l'ospedaa privaa el pussee gross de la città. In del 1974, dopo di restrutturazion, el riva a 400 lecc.

In del 1978, cont i legg che istituissen el Servizzi Sanitari Nazional a l'è recognossuu 'me ospedaa general e in del 1990 el firma 'n accord con l'Università di Studi de Milan per vess 'n pol universitari.[2]

El 1 de agost 2006 a l'è ceduu in gestion di Frati a 'n azienda ciamada Milanocuore, che in del 2009 el ced el controll a la Villamaria, che in del midemm ann el ced a la Multimedica. In del 2016 i Frati ghe venden anca la struttura per 85 milion de Euro, con l'obligh de tegnìll 'me ospedaa almen per 18 agn.[3]

Servizzi[Modifega | modifica 'l sorgent]

El gh'ha 335 lecc, 90 ambulatori, 7 sal operatori e dò sal de part e l'è specializzaa in la medesina de urgenza, soratutt per quell che 'l revarda i ictus, e in su la cerusia de la man.[3]

Riferiment[Modifega | modifica 'l sorgent]

  1. 1,0 1,1 La nostra storia - ASST Fatebenefratelli-Sacco
  2. Infermieristica - Università degli Studi di Milano
  3. 3,0 3,1 I Fatebenefratelli vendono l’ospedale San Giuseppe di Milano

Ligamm de foeura[Modifega | modifica 'l sorgent]

Vos corelaa[Modifega | modifica 'l sorgent]