Modell:Vetrina/4

De Wikipedia
La tomba del Lanzin Curt al Castell Sforzesch

La storia de l'ortografia lombarda l'è scominciada sgiamò cont i prim test de la lengua lombarda compagn del Sermon divin e la se poeu compartì in tri modei principai: quell tradizzional, quell fonetegh e quell eterolegh. Per modell tradizzional se intend quell modell che 'l gh'ha origin direta in la manera de scriver pussee antiga del lombard.

Compagn de la pupart di volgar latin in principi la gh'era una certa varietà in del scriver a segonda de l'autor: i prim test lombard, che resalissen al secol quell de XIII, gh'haveven di element arent a l'ocitan, compagn del doperà de la "ç", desgià che l'ocitan l'era una lengua assee important in l'Altitalia de l'epoca.

Sgiamò del Liber di Tre Scriciur se troeuven di element carateristegh de la grafia lombarda, compagn de la diferenziazzion in tra la "o" e la "u". In contemporanea anca in l'area lombarda oriental la gh'haveva di scerne compagne, come se po vedè in di "Lod" scrivude in la bergamasca o in del Mayor gremeza in bressan.

Intorna al secol quell de XV a Milan gh'è di poeta in la Cort di Duca, el pussee important el Lanzin Curt, che doperen el volgar milanes e tachen a definì di regole noeuve, che inn restade anca in la pupart di grafie che gh'è stade dopo, ma gh'è ancamò di ciar element volgar, compagn del doperà de la "x", per esempi in la parola "amix".

(Inanz)