Il maritaggio di Mommina

De Wikipedia
(Rimandad de Maritaggio di Mommina)
Lumbard ucidental Quest articol chì l'è scrivuu in lombard, grafia milanesa.

El Maritaggio di Mommina (in lombard: el Maridozz de la Mommina) a l'è ona comedia scrivuda del canonegh bustocch Bias Bellott, in de la segonda metaa del Settcent.
I studi crittegh a fann pensà che la sia stada componuda dopo del 1770.

A se tratta de l'oeuvra pussee veggia scrivuda in de la parlada de Bust Grand (anca se la g'ha dent anca di tocch in italian). La comedia la se inseriss in del firon che 'l partiss di oeuver del Magg, e l'è piena de citazzion de la Sposa Francesca del De Lemene.

Trama[Modifega | modifica 'l sorgent]

A Bust Grand a gh'è ona tosa che la se ciama Mommina, e ghe vann adree trii omen: el Penagg, on omm brutt e vegg ma pien de danee; el Finett, bell e giovin ma spiantaa; el scior Arsili, che l'è giovin e anca nobil.
El Penagg el proeuva a toeu el consens de la Mommina cont el daggh di danee tant 'me "caparra": lee la voeur minga zed, anca se a la fin la se ten i danee. Dopo on poo el riva l'Arsili, che 'l ghe deciara el sò amor a lee, ma la Mommina l'è minga tant segura di intenzion del giovin (anca perchè lu el parla in italian, e lee la capiss minga ben quell che l'è dree a dì). In de quella, el riva el Finett che 'l ruza con l'Arsili, e quell lì el va via per minga mettes in di guaj: dopo on poo però el torna indree e 'l ghe dis a la Mommina che 'l g'ha l'intenzion de sposalla de vera, e lee la dis de sì.
El dì adree l'Arsili el ciama on nodar, el sur Rampogna, per mett giò i cart del sposalizzi: intant che 'l Rampogna l'è dree a scriv giò i document, l'Arsili el cerca per la strada di testimoni, e per cas l'incontra el Penagg. Quell lì, a savè che 'l g'ha de fà el testimoni per el maridozz de la Mommina, el se inrabiss e 'l sostegn de avè pagaa prima lu per el matrimoni. Anca la Mommina la va giò in strada e la ghe vosa adree de moccalla lì. Ma a la fin el Penagg el se consolla cont el sposà on'oltra tosa del paes, anca con la consulenza legal del nodar Rampogna.
L'unegh che 'l resta con voeui i man a l'è 'l pover Finett, che l'ha descovert che l'ha ruzaa cont on scior, e adess l'è costrett a scappà via: donca el decid de ciappà su e de andà a Roma 'me pelegrin. La comedia la finiss proppi cont el Finett che 'l partiss, el saluda Bust Grand (citaa bondanziosa, indè che gh'è tutt chel ch'a cercarì) e 'l se recomanda cont el publich de stà lontan di vizzi.