Marcorell

Quest articol chì l'è scrivuu in lombard, grafia milanesa.

Statua del Marcorell

El March Aurell Antonin (latin: Marcus Aurelius Antoninus; 26 de avril del 121 – 17 de marz del 180), cognossuu anca nomà ’me “Marcorell”, l’era on imperador roman e on filòsef stòegh. L’era on member de la dinastia Nerva-Antonina e el darree dei inscì-cimaa “zinch imperador bon”.

El Marcorell l’era el fiœu del pretor March Anni Ver e de la sò miee, la Domizzia Cavilla. Quand che gh’è mòrt sò pader el gh’heva trii agn a pena, e l’è staj tiraa su de la mader e del pagrand. Depos che l’Eli Zeser – fiœu dottiv de l’Adrian – l’è indaj al babbi ind el 138, l’Adrian l’ha dottaa el barba del Marcorell, l’Antonin Pia, ’me sò suzzessor. Pœu, del sò, l’Antonin l’ha dottaa el Marcorell e el Luzzi Ver – el bagaj de l’Eli. In quell ann chì gh’è mòrt anca l’Adrian, e l’Antonin l’è deventaa imperador. Deggià che delzadess l’era l’ered al tròn, el Marcorell l’ha studiaa gregh e latin sòtta di bravi majester e el s’è pœu sposaa con la Faustina – la tosa de l’Antonin – ind el 145.

Depos che gh’è mòrt l’Anonin ind el 161, el Marcorell l’è suzzeduu al tròn insema al fradell dottiv. Sòtta al Marcorell, l’Imperi roman l’ha veduu pròppi tanc conflitt, soratutt de caratter militar. Anca i cristian vegneven despess sarraa adree, ma a par che la colpa la fudess minga soa, deggià che San Giustin le lòda sovenz. El Luzzi Ver l’è moruu de on malann proabilment ind el 169, e el Marcorell l’è vegnuu el soll imperador a menà inanz l’Imperi. Quand che l’è mòrt anca lu ind el 180, gh’è indaj su sò fiœu Comed, che tamen l’era minga inscì ben amaa de la gent e de la critega.

Òlter progett

Altri progetti

• Wikisource
• Wikisource
• Wikiquote
• Wikimedia Commons

• Wikisource el gh'ha dent una pagina dedicada a Marcorell
• Wikisource el gh'ha dent una pagina in lingua greca dedicada a Marcorell
• Wikiquote el gh'ha dent citazzion de o su Marcorell
• Wikimedia Commons el gh'ha dent imagin o alter archivi su Marcorell