Lorét (Bèrghem)

De Wikipedia
(Rimandad de Lorét (Bg))
La parochiàl de Lorét

Lorét l’è ü quartér de Bèrghem che l’ se tróa a sira (ovest) de la sità a i pé di còi de Bèrghem, tra la sità basa e Lónguel e co la seriöla Sère (Fossatum Communis Pergami) che ghe pasa ‘n mès. L'è traersàt fò da la via Brusida che la menàa da Bèrghem a Lèch.

Lorét l’ ciapa ‘l nòm dal Santuare de Lorét che l’ se tróa ‘n Pruinsa de Ancuna, desà che tra ‘l 1620 e ‘l 1622 i à fai sö öna césa dedicada a la Madóna de Lorét, césa che che adès l’è la parochiàl del bórgh.

Lorét l’ se troàa fò da i Müraine, i müre de la sità basa, face sö da i Venesià e l’è sèmper istàcc ü bórgh de campagna e amò al dé de ‘ncö s’pöl vèt tate casine che i è stace ristrutürade, ma ghe n’è ach tate che i è stace pürtròp bötade şó, l’öltima ‘n del 2008 e ‘n del 2009 per fà pòst a de le speculasiù.

Tra i casine che i è rimaste se regórda ol “Castèl” e ‘l “Contradèl”, mentre ‘l “Vaticano”, isé ciamàt desà che l’ gh’éra ü slarch redùnd che l’ regordàa ‘l colonàt del Bernini ‘n piasa San Péder ‘n Vaticà, l’è stai bötàt şó ‘n del 2009.

Dòpo la fì de la segónda guèra mondial Lórèt da bórgh campagnöl l’è dientàt ü gròs quartér de periferéa, pié de şét, de cà e de palasù.

In del 2008 i à dervìt fò ön ótra césa, pròpe denàcc a chèla ègia, dedicada al San Masimilà Kolbe.