Lojze Grozde
 |
Quest articol chì l'è scrivud in lombard, con la Noeuva Ortografia Lombarda |
El Lojze Grozde (Zgornje Vodale, 27 de masg 1923 - Mirna, 1 de sginer 1943) a l'è stad un student sloven, copad di partesan sloven comunista e venerad de la Gesa catolega 'me bead del 13 de sgiugn 2010.
Biografia
[Modifega | modifica 'l sorgent]Nassud in d'una fameja povera vesin Lubiana e mai reconossud del pader, l'è cressud soratut di noni e in la fed catolega e del 1935 el se iscriv al licee di Lubiana, e 'l viv in del convit vescovil de Marijanišče, indova che ghe va dent a la Congregazzion Mariana e anca a l'Azzion Catolega, e 'l se troeuva anca sbatud in tra la vocazzion de sacerdot o quella de apostolad laich, a la fin el serniss la segonda.[1][2]
Cont el s'ciopà de la segonda guerra mondial e 'n tacà de la resistenza comunista in Jugoslavia el tira inanz la soa atività religiosa, e 'l saveva ben del ris'c de finì martir, 'me l'era capitad a vari pret al temp.[2]
El martiri
[Modifega | modifica 'l sorgent]Tornad in la soa cità per el Nedal del 1942, perchè el voleva vedè la soa mam, el prim de sginer el ciapa l'Eucaristia per l'ultima voeulta in la badia de Stična: a l'è fermad poch dopo a Mirna di partesan, che sospetaven che l'era un correr anticomunista e dopo che l'hann interogad, a trovàgh adoss un Messal, una cobia de l'Imitazzion de Crist e di santit de la Madona de Fatima, el menen in d'una tratoria indova che 'l torturen e 'l mazen.[1]
Miss sota in d'un bosch, di bagaj troeuven el so corp el 23 de fevrer, con sora di segn de tortura ma incorrot, e l'è poeu miss sota in del fopon de la soa cità: la noeuva de la mort l'è censurada sota el regim comunista ma, a dispet de la censura, el sit che l'hann miss sota el deventa un sit de pellegrinagg silenzios per i cristian de la Slovenia.[2][1]
Sgiamò del 1944 el pret e servidor de Dio Anton Strle l'ha scrivud una soa biografia, ben popolar in tra i catolegh sloven.[3]
La beatificazzion
[Modifega | modifica 'l sorgent]El process per fàll bead el scomincia del 1992 per volontà de l'arcivescov de Lubiana e 'l finiss el 13 de sgiugn 2010 quand che durant el congress eucaristegh de Celje el cardinal Tarcisio Bertone el nonzia oficialment la soa beatificazzion, dopo che el 27 de marz el Papa Benedet XVI l'haveva reconossud el so martiri.[1][4]
Del 2011 el so corp l'è miss sota in del santuari de Trebnje, sit de pellegrinagg pussee important de la diocesi de Novo Mesto.[5][6]
Riferiment
[Modifega | modifica 'l sorgent]- 1 2 3 4 Comunità Cenacolo - Comunità Cenacolo. URL consultad in data 2026-01-02.
- 1 2 3 (IT) Lojze Grozde. URL consultad in data 2026-01-02.
- ↑ bl. Alojzij Grozde | Katoliška cerkev. URL consultad in data 2026-01-02.
- ↑ (SL) Biography of blessed Alojzij Grozde. URL consultad in data 2026-01-02.
- ↑ . URL consultad in data 2026-01-02.
- ↑ it-IT CHIESA DELLA MADRE DI DIO E DEL BEATO ALOJZIJ GROZDE A ZAPLAZ [2011]. URL consultad in data 2026-01-02.
Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Lojze Grozde
