Liuteria tradizionala cremonesa
|
Quell articol qì l'è scrivud in Lombard, cond l'ortografia Scriver Lombard. |
La liuteria tradizionala cremonesa l'è un'antiga forma de artijanad tipiga de Cremona, indove i è costruids i struments ad arc, come i violin, i viole, i violoncell e i contrabass.
I savir e ol savir far liutare de la tradizion cremonesa (italian: Saperi e saper fare liutario della tradizione cremonese - ingles: Traditional violin craftsmanship in Cremona) l'è deventada part de la lesta di Patrimoni orai e mìa materiai de l'umanità de l'UNESCO[1] ind la VII conferenza de Paris del Comitat Intergovernativ.[2]
Storia[Modifega | modifica 'l sorgent]
La liuteria l'ha començad a svilupar-s a Cremona ind el XVI secol, grazie a la famea Amati, poi evolude coi famee Stradivari, Guarneri e Bergonzi. Qelle famee qé, qi i lavorava ind i so botege, i se tramandava i segrets de la lavorazion di pader in fiœl. Ol plœ famos di artisti cremones l'è Antonio Stradivari, e la so cà al dé d'incœ l'è deventada un museo, coi so arnes e disegn orijinai.[3][4]
Tenica[Modifega | modifica 'l sorgent]
I struments ad arc i pœl vesser realizads in manera diversa, ma i liutai cremones i ha svilupad una tenica considerada come unega al mond.[5]
Per ogne strument i è modellads e metids insema a man plœ de 70 divers toc de legn, ognun di quai al g'ha besogn de una lavorazion diversa sœ la bas de la risposta acustiga qe al g'ha: per qell motiv qé i ga sarà mai do violin uguai. Ogne part del violin la g'ha de vesser faita con un legn particolar, selezionad e stajonad al natural, perqè la so preparazion la pœl mìa vesser forzada o faita in manera artifiçala.[4]
I pœl mìa vesser dovrads di parts industriai, e l'è vietad ol dovrar di verniç a sbrof. Tants elements de l'istrument, qe i somea adoma de veder, i è in realtaa funzionai per l'amplificazion del son o per protejer-l da rotura: dobia carateristica tipiga di prim violin.[4]
Ol liutae al sta dree a tœta la costruzion di struments, da l'arbor a la fin: per qesto i riva a far sœ adoma dai 3 ai 6 istruments l'ann.[4]
Galleria d'imajin[Modifega | modifica 'l sorgent]
Violin esponids al Museo del violin de Cremona
La vetrina de un liutae a Cremona
Museo del violin
Arbor di liutai
Arnes di liutae
Verniçadura de un violin
La violinista Olga Kholodnaya la sona un Stradivari
Tutela[Modifega | modifica 'l sorgent]
L'antiga tradizion de la liuteria cremonesa l'è tutelada da do organism: ol Consorzio Liutai Stradivari e l'Associazione Italiana Liutaria, qe i representa plœ de 140 artijan[4]. G'è anc la Scœla Internazional de Liuteria de Cremona, fondada ol 21 de setember del 1938[6]
Dopo qe l'è stait recognossid da l'UNESCO, l'è stait dervid, ind el 2013, ol museo del violin ind el Palaz de l'Art de Cremona, ristruturad tœt e a l'interno del qual l'è stait realizad un nœv auditorium per scoltar la musiga sonada coi strument realizads ind la citaa.[7]
Riferiments[Modifega | modifica 'l sorgent]
- ↑ (EN) Traditional violin craftsmanship in Cremona
- ↑ (EN) Decision of the Intergovernmental Committee: 7.COM 11.18
- ↑ (IT) Saper fare liutario cremonese
- ↑ 4,0 4,1 4,2 4,3 4,4 (EN) Nomination file no. 00719
- ↑ (IT) La liuteria di Cremona iscritta nella Lista UNESCO del Patrimonio Immateriale
- ↑ (IT) Scuola Internazionale di Liuteria
- ↑ (IT) Museo del violino