Lenguagg de programmazion esoteregh

Quest articol chì l'è scrivuu in lombard, grafia milanesa.

On lenguagg de programmazion esoteregh l'è on lenguagg de programmazion faa in manera de vess el pussee diffizil de lensg che se pò o faa per ciappà in gir i lenguagg classegh, pensaa no donca per vess doperaa per programmà debon. A bon cunt i gh'ha nissuna utilità reala, ma hinn pussee di gioeugh per i hacker o di lenguagg didattegh per imparà comé che la fonziona la macchina.

El primm l'è staa INTERCAL, che 'l prendeva in gir el FORTRAN e 'l COBOL in del 1972, e vint agn dopo l'è sortii foeura FALSE: El sò compilator l'era grand domà 1024 byte e 'l gh'aveva 'na sintass confusa. Pocch dopo Urban Müller l'inventa el Brainfuck, che 'l dopera domà vott caratter.

Gh'è anca di lenguagg probabilistegh, ossia indova gh'è mia la sicurezza che on'istruzion la sia eseguida.

Esempi

LOLCODE

LOLCODE l'è 'n imitazion del lenguagg di lolcat. Chi vedom 'n hello world:

HAI   
CAN HAS STDIO?   
VISIBLE "HAI WORLD!"   
KTHXBYE

Brainfuck

In Brainfuck gh'è domà vott caratter e l'è assee arent a 'na macchina de Turing:

++++++++++[>+++++++>++++++++++>+++>+<<<<-]>++.>+.+++++++..+++.>++.<<+++++++++++++++.>.+++.------.--------.>+.>.

Malbolge

Malbolge l'è inscì gramm de scriv che 'l primm hello world l'è staa scrivuu da on programma, gh'è voruu du agn e l'era imperfett:

(=<`:9876Z4321UT.-Q+*)M'&%$H"!~}|Bzy?=|{z]KwZY44Eq0/{mlk**
hKs_dG5[m_BA{?-Y;;Vb'rR5431M}/.zHGwEDCBA@98\6543W10/.R,+O<

Bibliografia

• Camille Paloque-Bergès (2009). "Langages ésotériques". Poétique des codes sur le réseau informatique. Archives contemporaines. ISBN 978-2-914610-70-4.