Isep Bernardon

Quest articol chì l'è scrivud in lombard, con la Noeuva Ortografia Lombarda

L'Isep Bernardon (Giuseppe Bernardoni in italian; Milan, 10 de sginer 1771 - 1852) a l'è stad un libretista, burocrat e poeta lombard.

Biografia

Nassud de una familia pora, el taca a studià con l'Isep Parin 'me maester ma el gh'ha de lassà in mez al licee per andà a lavorà 'me comess per una cà editorial: quell lavorà chi el menarà a una passion per i liber tala che 'l lassarà, a la mort, una biblioteca de 8000 volum.

Con la revoluzzion francesa ghe va dent a la burocrazzia del noeuv stat: el deventa ispetor de polizzia e l'è incaregad de fà su el Teater patriotegh e 'l va semper pussee inanz de grad in la polizzia. Al tornà di austriegh, l'è tegnud 'me burocrat in la Reggenza, e in tut 'sto temp chi el va inanz a studià i classegh e la literadura.

El s'è mai sposad e 'l gh'ha nanca havud de fioeui.

Literadura

L'ha scrivud varie poesie de pregi in milanes, che per vari agn inn stade atribuide al Carlo Porta, tant 'me La caduta di Fetonte, Oh, ti povro Fransisch, cruni polacch, Cicognara se dis l'ha fua on quadrett e 'l Brindes per on disna alla Cassina di Pomm.

El Ferdinando Fontana ghe atribuiss fina el famos sonet Paracar che scappee de Lombardia.

El gh'haveva una mesizzia e un raport de letera con vari esponent de la coltura del so temp, tant 'me l'Ugo Foscolo, l'Isep Pozzon, el Giovanni Gherardini e 'l Giulio Perticari.

Riferiment

Ancora su Giuseppe Bernardoni, corrispondente di Monti, librettista e purista per caso

Alter proget

Wikimedia Commons el gh'ha dent imagin o alter archivi su Isep Bernardon

Bibliografia

Antologia Meneghina, Ferdinando Fontana, 1900, Belinzona