Ironem Biragh

De Wikipedia
Sata a-a navegassion Sata a-a serchia
Lumbard ucidental Quest articol chì l'è scrivuu in lombard, grafia milanesa.

El Ironem Biragh (it: Girolamo Birago; Milan, primm de november del 1691 - Milan, tredes de dicember del 1773) l'è staa on giudes, scrittor, poeta e autor de teater lombard.

Vita[Modifega | mudìfica 'l sorgènt]

L'era el fioeu del Giambatista Biragh e de la Paola Sirtol, e donca l'era el member de vuna di famej pussee antigh e important de Milan. L'è staa batezaa a Cologn, in de la villa di Biragh. El s'è laureaa in diritt in del 1712 a Pavia, e poeu l'è staa member del Colegg di Giudes. Per dodes agn l'è staa maester in di scoeul "Cenobiann". Inoltra l'è staa Vicari del Podestà de Milan e giudes pretori. In tucc 'sti lavorà el s'è comportaa de giust e de onest, come gh'è staa recognossuu anca del Peder Verr. In del 1751 l'è staa eleggiuu deputaa de la comunità de Cologn.
Quand che l'è mort, a vottantaduu agn, l'è staa sotraa in de la gesa de San Simplizzian, dent in de la tomba de la fameja.

Oeuver[Modifega | mudìfica 'l sorgènt]

Per tutt la soa vita l'ha scrivuu in lombard per divertiment. In de la soa vita, l'ha faa publicaa domà la comedia Donna Perla (1724), menter che 'l rest di sò oeuver j'ha lassaa manoscritt ai sò amis. L'è consideraa el primm ver erede del Carlo Maria Magg, e la soa importanza gh'è stada giamò recognossuda del Parin, duranta la polemega ciamada "Brandana".
L'ha scrivuu comedi, poemett e on bell numer de sonett. In tra de lor, a troeuvom:

  • Donna Perla (1724)
  • Meneghin a la Senavra (1728)
  • Testament del Meneghin (1759)

In de la soa produzzion gh'hann on sit bell important i letter in quartinn milanes scrivuu ai sò amis, cioè i member di famej nobei de Milan: in tra de lor a poeudom regordà l'arcivescov Isepp Pozzbonell, el marchesin Angiol Meraveja Mantegazza, el cont Antoni Besozz, el cont Flamini Gallio del Pozz. In 'sti letter lu el se presenta semper 'me Meneghin, e donca el ciappa i pagn del servidor savi e fedel che l'era staa creaa del Magg.

Bibliografia[Modifega | mudìfica 'l sorgènt]