Imperador del Giappon

De Wikipedia
Lumbard ucidental Quest articol chì l'è scrivuu in lombard, grafia milanesa.
El Stendard Imperial giappones

L'Imperador del Giappon (in giappones: 天皇 Tennō [tennoꜜo]) a l'è el capo de la Famija Imperiala giapponesa e capo de Staa del Giappon. Segond la Costituzion del 1947, l'Imperador a l'è el "simbol del Staa e de l'unidàa del popol." Storegament, l'Imperador a l'è anca la pussee volta autoridàa in la religion scintoista perchè lu e la sò famija a hinn consideraa i descendent dirett de Amaterasu, la dea del Sol, e la sò importanza l'è anca de occupàss di question spiritual, coma i rituai scintoist in tutta la nazion.

El termin giappones per "imperador" a l'è Tennō (scrivuu 天皇 in kanji), ch'el voeur dì "sovran celestial". In Giappon, l'imperador l'è minga ciamaa cont el sò nomm, ma l'è semper ciamaa "Sò Maestàa l'Imperador" (天皇陛下 Tennō Heika) o domà "Sò Maestàa" (陛下 Heika), e in la lengua scrivuda a l'è ciamaa "L'Imperador Regnant" (今上天皇 Kinjō Tennō). Quand on imperador el moeur, el ciappa coma nomm postumo quell de la sò era: per esempi l'imperador Hirohito, che l'ha regnaa in l'era Shōwa, l'ha ciappaa el nomm de imperador Shōwa quand l'è mort, in del 1989.


Al dì d'incoeu, l'Imperador del Giappon a l'è l'unegh capo de staa de la Terra che l'è ciamaa imperador. Incoeu l'Imperador l'è Naruhito, che l'è andaa su in sul trono in del 2019, cont l'abdicazion de l'imperador Heisei. Coma l'era attuala la se ciama Reiwa, quest chi l'è el nomm ch'el ciapparà l'imperador quand el morirà o el abdicarà.

El roeul de l'Imperador, al dì d'incoeu, a l'è ceremonial e definii in la Costituzion giapponesa del 1947; denanz, gh'hinn staa di temp indova l'Imperador a l'era ona figura ceremoniala e alter indova l'era ona figura regnant. Finn al 1946, l'Imperador a l'era consideraa ona divinitàa, ma i american, finida la Seconda Guerra Mondial, hann costringiuu l'imperador Shōwa a rinnegà la natura divina de la carica imperiala per el roeul che l'aveva avuu in de la guerra.

L'Imperador el viv in del Palazz Imperial de Tokyo, ciamaa Kōkyo (皇居 "residenza imperiala") in giappones, ch'el se troeuva in del center de la cittàa de Tokyo, capital del Giappon a partì del 1868; denanz la capital a l'era stada Kyoto per vundes secoi.