Hack de Wikimedia del 2026

Quest articol chì l'è scrivud in lombard, con la Noeuva Ortografia Lombarda

L'hack de Wikimedia del 2026 l'è capitad el 5 de marz del 2026 e l'ha menad al meter in letura i database de Wikimedia per un para de ore: l'è stad causad de l'inseriment de un worm in di file comun de scripting per un error de un dependent de la Foundation.

I event

In del 2023 un script gram l'è doperad contra di proget in russ che s'inn destacad de la Wikipedia e un quaj mes inanz un utent el cobia in d'una soa sota-pagina de la Wikipedia in russ: lilinsì el script el resta per un ann e mez, fina al 5 de marz 2026 quand che vun di lavorent de la Wikimedia Foundation, un ingegner de la sigurezza informatega, intant che 'l provava i limit di API globai per i script di utent, el met in del so global.js, e vist che 'me cunt del staff el gh'ha anca i dirit de ministrador de l'interfacia el script, che 'l fonziona tant 'me un worm, el se met denter al common.js de Meta-Wiki, e 'l infeta tucc quei che 'l visiten cont i JavaScript ativ, fina el cunt WMFOffice l'è stad compromess.

Intorna ai 15:30 UTC la scomincia l'atività malevola e in vintitrii menut tucc i edizzion di proget Wiki a inn miss che se poden domà lensger, insì de fermà el spantegament del script: intorna ai 17:00 UTC tornen verte anca in scritura, ma con la pupart del scripting smorzad, e gh'è de spetà mez'ora per havéghel ancamò.

Inn modifegade 3'996 pagine e tocad 85 utent.

Conseguenze

Tucc i pagine scancellade a inn stade mitude ancamò in su MetaWiki e la Wikimedia Foundation l'ha nonziad de vesser dree a lavorà a di mitigazzion per i atach via script. I dacc di utent e i so credenziai inn stad minga miss in pericol.

Azzion del script

El script el proeuva a otegnì la persistenza a metés file common.js de l'utent e, se gh'è i permess, anca in quell global: poeu el derva una pagina a cas grazzia a la pagina special Random e ghe met dent un'imagin - che la gh'è no in sui proget Wikimedia - e la proeuva a caregà anca un script, che però quand che gh'è capitad el rebellot l'era sgiamò descomparid de l'Internet. Come oget de la modifega el meteva " Закрываем проект", che in russ el voeul dì pu o men "el proget l'è serrad".

El proeuva anca a doperà la fonzion de scancellazzion massiva Nuke in manera de scancellà 500 pagine a cas de l'enciclopedia e de ciciarada, e 'l fa ogni voeulta che se carega una pagina se gh'è i permess.

Riferiment

Alter proget

Wikimedia Commons el gh'ha dent imagin o alter archivi su Hack de Wikimedia del 2026