Giusepp Sala

De Wikipedia
Lumbard ucidental Quest articol chì l'è scrivuu in lombard, grafia milanesa.
Giusepp Sala

Sindegh de Milan
In carica
Prencepe del mandad 21 de giugn del 2016
Predecessor Giuliano Pisapia

Informazion jenerale
Partid politeg Europa Verda
Titol de studi Laurea in Economia aziendal
Profession Manager

El Giusepp Sala (it. Giuseppe Sala; Milan, 28 de magg del 1958) l'è on dirigent d'azienda e politegh lombard.
L'è staa el comissari unegh de l'Expo 2015 e ministrador delegaa de Expo 2015 S.p.A.. A partì del giugn del 2016 l'è sindegh de Milan.

Vita[Modifega | modifica 'l sorgent]

El s'è laureaa a la Bocconi in del 1983, per poeu lavorà in de la Pirelli. Lainscì l'ha quattaa vari incaregh in di arei del controll de la gestion, de la pianificazzion strategica, de la valudazzion di investiment e in di inizzativ noeuv del business.
In del 2009 l'è staa ciamaa del sindegh de Milan, la Letizia Moratti, per vess el direttor general del comun de Milan. L'ha mantegnuu quella carega chì fina al giugn del 2010. A partì del 2012 l'è staa el president de l'A2A.
L'è staa el rapresentant del comun de Milan in del consili de ministrazzion de Expo 2015 S.p.A.. In del 2013 però l'è staa nominaa de l'Enrico Letta (al temp, president del consili) comissari unegh del governa per l'Expo.

Cariera politega[Modifega | modifica 'l sorgent]

A la fin de dicember del 2015 el se candida ai primari del center-sinistra per scernì foeura el sucessor del Giuliano Pisapia. El troeuva el sostegn de on bell tocch de la dirigenza del Partii Democrategh nazzional e local, oltra che de l' Umbert Ambrosoeu. I sò sfidant a hinn el Pierfrancesco Majorino, la Francesca Balzani e l'Antonio Iannetta.

El 7 de febrar el ciappa el 41% di preferenz ai primari, e inscì el vengg la competizzion e 'l deventa el candidaa del center-senistra.

In de la competizzion elettoral per el post de sindegh el se troeuva a confrontàss soratutt cont el candidaa de center-destra, el Stefano Parisi. Al primm turno (5 de giugn del 2016) el se piazza al primm post cont el 41,7%, intant che 'l Parisi el ciappa el 40,8%.

Al ballottagg (19 de giugn) inveci el ciappa el 51,7% di consens, e 'l sò aversari inveci el 48,3%: inscì, el 21 de giugn el deventa el noeuv sindegh de Milan.

El 15 de dicember del 2016 el descovriss de vess indagaa per el sò lavorà in l'Expo e 'l scerniss de autosospendes. A l'è sostituii de la Sindega pro tempore Anna Scavuzzo, la sò vice, per poeu tornà el 20.

In di elezioni del 2021 el se ricandida e 'l batt al primm turn el candidaa del center-destra Luca Bernardo.

Vos corelaa[Modifega | modifica 'l sorgent]