Giordan de Civ

De Wikipedia
Jump to navigation Jump to search
Lumbard ucidental Quest articol chì l'è scrivuu in lombard, grafia milanesa.

El Giordan de Civ (it. Giordano da Clivio; Civ, XI secol - ..., quatter de otober del 1120) l'è staa on arcivescov lombard.

Biografia[<small>Mudifega</small> | mudìfica 'l sorgènt]

L'è nassuu a Civ, arent a Vares. A l'è entraa in de la Gesa de Milan che l'era anmò gioven, e l'è staa ordinaa sudiacon ai temp de l'arcivescov Grossolan. A l'era de 'na fameja baronal importanta in Lombardia. L'ha studiaa in Provenza, compagn de tanti olter sciori milanes del temp. L'è tornaa a Milan in del 1111, e ordinaa preved el primm de setember Ariald de Genoa. Grossolan l'è partii per on pellegrinagg in Terra Santa, e l'ha lassaa a governà la diocesi el Guazzon Comin e l'Amizon de Sala insema cont Arderigh de Lod, intant che 'l Giordan el scusava de Vicari. Intant che 'l Grossolan l'era via, i sò nemis hann ciapaa el poter e l'hann depost e hann eleggiuu el Giordan al sò post. In del febrar del 1112 el vescov Landolf de Ast l'ha consacraa arcivescov, insemma con l'Ariald e 'l vescov Mainard de Turin. I unegh che hinn restaa fedei al Grossolan hinn staa i vesvov de Acqui e de Lod. El ses de dicember, el Mainard l'ha depost formalment el Grossolan a l'altar de Sant Ambroeus. El Giordan e 'l vescov Bernard de Pavia hann proclamaa ona pas general in Lombardia. Donca el g'ha 'vuu on recognossiment ofizzial del papa Pasqual II, che l'ha regolarizaa la soa elezzion.
In de l'agost del 1113, el Grossolan però l'è vegnuu indree del sò pellegrinagg. La tension a Milan la s'è guzzada, perchè 'l vegg arcivescov el gh'era anmò di sostegnidor. Infina, el vundes de marz del 1116, el papa l'ha dii che Grossolan el saria staa el vescov de Savona, e Giordan quell de Milan.
El Giordan l'è semper staa on sostegnidor del papa, e sotta el sò episcopaa Milan l'è deventaa vun di center pussee important de l'antimperialism. L'ha descomunicaa l'imperador Enrigh V in de 'na zerimonia a Santa Tecla.
Quand che l'è mort, l'è staa sostituii de l'Olrigh.