Gaspar Vimercaa

De Wikipedia
Sata a-a navegassion Sata a-a serchia
Lumbard ucidental Quest articol chì l'è scrivuu in lombard, grafia milanesa.

El Gaspar Vimercaa (1410 circa - Milan, 4 de settember 1468) a l'è staa 'n condottiee e politegh milanes.

Biografia[Modifega | mudìfica 'l sorgènt]

Member de l'antiga familia di capitani di Vimercaa, l'è andaa in servizzi per el Ducaa de Milan finna de giovin e in di ultim guerr del Filipp Maria Vescont el guadagna 'me offizial la fiducia incondizionada del Franzesch Sforza. A la proclamazion de la Republega Ambrosiana, che la catta foeura el Sforza 'me sò condottiee, a l'è mandaa in la Bassa bergamasca e 'l se prodiga in la difesa de Carevasg, indova che 'l se destingh per la soa bravura in la tecnega de l'artilieria, indova che 'l riess a bloccà - in del 1448 - a destrugà i difes del Marches de Mantoa.

L'è elegiuu in tra i 24 defensor de la libertà de la Republega, el s'è mostraa finna de subit in tra i fautor de la nomena del Franzesch Sforza 'me Duca de Milan. In del 1450 a l'è in tra i organizzator de la Rivoeulta de Milan che, grazia a la pagura de avègh de sottamettès a la Republega de Venezia per soraviv, la permett de dervì i trattativ per fà tornà el Ducaa, guidaa del Sforza.

In del renoeuvaa Ducaa a l'è faa consiliee del Duca e l'è creaa cont de Valenza. Restaa per ona desinna d'agn a Milan, a l'è ciamaa del Sforza a guidà i trupp milanes in la guerra contra Genoa, che 'l riess a ciappà el 19 de april 1464, a l'è nomenaa governator de la Città, menter che 'l tacca la fortezza del Castellett, che la se rend dopo de pussee d'on mes, cont on gran us de l'artilieria.

L'ann dopo el toeu part a la spedizion del Galeazz Maria Sforza per juttà el Re de Franza, e 'l riva finna a Lion cont i sò soldaa. El se retira pocch dopo de la mort del Franzesch Sforza e 'l moeur el 4 de settember 1468. A l'è miss sotta in la Gesa di Grazzi, in d'on terren che l'eva donaa lu al principi del decenni per fà su la Gesa. In di ultem agn de la soa vitta l'eva faa anca di attività diplomategh cont i alter Signorij, per esempi con Fiorenza per podè avègh in presist di danee per rinforzà la milizia sforzesca e combatt el Bartolomee Colleon.

Riferiment[Modifega | mudìfica 'l sorgènt]

Vos corelaa[Modifega | mudìfica 'l sorgènt]