Federico Pesadori
El Federico Pesadori (Vergonzana, 3 de november 1849 - Bolzan, 8 de april 1923) a l'è staa 'n poetta italian, retegnuu el pussee important scrittor in dialett cremasch.
Biografia[Modifega | modifica 'l sorgent]
Nassuu de 'na familia borghes, el sò bobà a l'éra tenor a la Cort de Sassonia e l'ha frequentaa 'na scoeula semiprivada a Crema, che 'l cunta in la soa poesia Tèra da bucài. Giamò de fiolin el se mostra 'me 'n bon artista, sia in la musega che in del dissegn.
El va innanz a studià al Ginnasi de Crema, poeu al Licee a Lod e poeu a l'università a Padoa, indova che 'l se laurea in dirizz per deventà notar, profession minga amada de luu.
In del 1882 el se marida con la Amina Lantieri, s'cetta del notar de che l'eva faa pratica. Han avuu quatter fioeu, de che du mort de giovin per el tifo. Proppi al fioeu Bruno a l'è dedicàda la poesia L'ucarina, che l'è staa el daree cadò che 'l gh'ha faa prima de la malattia.
El viveva in tra Crema e Ricengh, indova che 'l gh'eva di cassinn e, amant de la calma, el se butta no in la vitta politega, anca se la commenta.
El moeur lontan de la città che ha amaa, a Bolzan, indova che l'éra andaa a visità la fioeula. A l'è miss sotta in del Famedio del Cimiteri de Crema.
Oeuver[Modifega | modifica 'l sorgent]
I sò oeuver, tutt in dialett cremasch, a hinn staa publegaa proppi de l'autor in del 1897 cont el titol L’eco della patria lontana e hinn staa poeu publegaa ancamò pussee volt dòpo de la soa mort.
I sò poesij parlen de la città (compagn de la nota A Crèma), de la familia, di event de la vitta e de la politega.
Bibliografia[Modifega | modifica 'l sorgent]
- Vanni Groppelli, Poeti dialettali cremaschi di ieri e di oggi, ed. Cassa Rurale ed Artigiana, Crema 1980
- Federico Pesadori, Poesie dialettali cremasche, ed. Leva, Crema 2000
- Vittorio Dornetti, Dentro i confini della piccola patria, in "Insula Fulcheria" , XXXVIII, dicembre 2008 vol. B, pagg. 9-38.