Distanziament social

De Wikipedia
Jump to navigation Jump to search
Lumbard ucidental Quest articol chì l'è scrivuu in lombard, grafia milanesa.
Esempi de comé di mesur de distanziament sociai pòden sbassà el picch epidemich e permett al sistema sanitari de curà i sgent, chi vist con l'epidemia de COVID-19

El distanziament social a l'è 'na manera minga farmaceutega de rallentà la diffusion de 'na malattija infettiva cont di mesur de salut publega che sbassen el numer e la forza di repport sociai in tra i personn in manera che calen i infett e donca i mort. A l'è pussee effettiv quand che la malattija la se spantega cont on stregg contatt fisegh o cont i gott de saliva o del respirà.

I maner pussee classegh a hinn l'isolament e la quarantena, che hinn faa in di confront de quej che hinn giamò malaa o hinn a ris'c fiss, menter che incoeu gh'è di mesur effettiv anca per i sgent che hin no malaa, compagn de la saradura di event de massa e di scoeur, de la reduzion del lavorà ai servizzi essenziai, la limitazion di palester e di straport publegh o el mett 'na distanza minima in tra i personn.

I studi mostren che, in cas de epidemia, 'sti mesur gh'avarien de vess adottaa subet: per esempi, in l'influenza spagnoeula del 1918 i Stat Unii han miss la saradura di scoeur e 'l diviett di assembrament: i città che han adottaa prima 'sti mesur han avuu di gran resultaa in del limità la diffusion e donca permett al sistema sanitari de resist. Di midemm resultaa gh'hinn staa in sul lavorà, indova che anca el sospend de 'na part piscininna ma significativa di post de lavorà el pò sbassà sosenn i malaa. La quistion a l'è stada voltada al publegh grazia a la Pandemia de COVID-19 del 2019-2020, quand che mesir de distanziament social hinn staa aplicaa in la pupart di Pajes.

Riferiment[Modifega | mudìfica 'l sorgènt]

Vos corelaa[Modifega | mudìfica 'l sorgènt]